Сурхондарёда хизмат вазифасини бажараётган ЙПХ ходимларини ҳақорат қилиб, уларни тасвирга олган ва ўзининг ижтимоий тармоқдаги саҳифасига жойлаштирган ҳайдовчи аёлга чора кўрилди. Бу ҳақда Сурхондарё вилояти ЙҲХБ матбуот хизмати хабар қилди.
Ҳайдовчи автомашинаси ён ойналарини рухсатномасиз “тонировка” қилгани учун 2025 йилнинг 12 июль куни ЙПХ ходимлари томонидан чора кўрилган бўлган. Бундан хулоса чиқармаган ҳайдовчи яна шундай турдаги қоидабузарликни содир этиб ИИО ходимининг қонуний талабини бажармасдан воқеа жойидан кетиб қолган.
Ҳайдовчи икки маротаба ҳуқуқбузарлик содир этиб, сўнгра унга маъмурий баённома расмийлаштирган ходимнинг шахсий телефонига қўнғироқ қилиб уни ҳақорат қилган. Шунингдек, ҳайдовчи аёл ИИБ чақиртирилганда ҳам ходимларни ҳақорат қилиб, шовқин солиб жавобгарликдан қутулиб қолмоқчи бўлган.
Денов тумани Ички ишлар бошқармаси томонидан ҳуқуқбузарликка оид маъмурий иш ҳужжатлари судга тақдим этилган. Суд ҳукмига кўра, судланувчи Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (ИИО ходимининг қонуний талабига бўйсунмаслик) иккинчи қисми билан айбли деб топилиб, 4 сутка маъмурий қамоқ жазоси тайинланган.
Юқоридаги ҳолатдан ташқари, ҳуқуқбузар аёл муқаддам бир неча маротаба ушбу ҳуқуқбузарликни содир этгани, қилмишидан ўзига тегишли хулоса чиқармагани ва бундай ҳаракатини давом этиб келаётганлигига оид яна бир иш ҳужжатлари тўпланиб, жиноят ишлари бўйича Узун тумани судига тақдим этилган. Унга кўра, аёлга БҲМнинг 20 баравари (7,5 миллион сўм) миқдорида жарима жазоси берилган.
Ҳуқуқбузарлиги учун маъмурий жазо қўлланилганидан сўнг 1 йил ичида такроран ҳуқуқбузарлик содир этгани туфайли Денов тумани ИИБ тергов бўлими томонидан ҳайдовчи аёлга нисбатан Жиноят кодексининг 140-моддаси (ҳақорат қилиш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)