Россияда талабаларга ҳарбий тайёргарлик курси ўқитилади

Россия олий ўқув юртларида «Ҳарбий тайёргарлик асослари» курси пайдо бўлади. Бу ҳақда мамлакат Таълим ва фан вазирлиги матбуот хизмати хабар берди.

Курс бакалавриат ва мутахассислик таълим дастурларига киритилади. «Ҳарбий тайёргарлик асослари» қўшимча касбий дастурлар доирасида ўрганилади. Курсдан мақсад ҳарбий ёки бошқа давлат хизматлари учун зарур бўлган бирламчи кўникма ва малакаларни шакллантириш.

Талабалар Россиянинг ижтимоий-иқтисодий, сиёсий ва ҳарбий-техник ривожланишининг асосий йўналишларини, халқаро муносабатларнинг хусусиятларини ўрганади. Бундан ташқари, талабалар модуль доирасида ҳарбий хизматни ўташнинг ҳуқуқий асослари ва бурғилаш машғулотлари билан танишади.