Тошкент бош арчасини ўрнатишга давлат бюджетидан 1,6 млрд сўм сарфланди

Тошкент шаҳри Юнусобод туманидаги Алишер Навоий номли кутубхона майдонига Янги йил бош арчасини ўрнатиш тадбирлари учун давлат бюджетидан 1 млрд 592 млн 858 минг сўм сарфланди. Бу ҳақдаги маълумотлар (№ 35, № 36) Давлат харидлари электрон порталига жойланган.

Порталда 20 декабрда давлат буюртмачиси Тошкент шаҳар маданият бош бошқармаси ва етказиб берувчи «Меdiа Globe» МЧЖ ўртасида байрам арчасини ўрнатиш тадбирлари учун иккита шартнома тузилгани кўрсатилган.

Шартномалар тузишда ҳеч қандай тендер ўтказилмаган ва харидлар тўғридан-тўғри амалга оширилган.

Порталда жорий йил давомида Тошкент шаҳар маданият бош бошқармаси ва «Меdiа Globe» МЧЖ ўртасида жами 7 та шартнома тузилгани кўрсатилган.

Хусусан, май ва июнь ойларида Таshkent flower festival учун давлат бюджети ҳисобидан 1 млрд 540 млн сўмлик (№17 ва №18) иккита, июндаги Опера фестивали учун жами (№16, №19 №20) 2 млрд 700 млн сўмлик учта тендерсиз шартномалар тузилган.

Сайтда кўрсатилган Тошкент шаҳар маданият бош бошқармаси билан «Меdiа Globe» МЧЖ ўртасидаги шартномаларнинг умумий қиймати 5 млрд 834 млн сўмни ташкил этган.

«Orginfo.uz» сайтида буюртмаларни тендерсиз олган «Меdiа Globe» МЧЖнинг 100 фоизлик улуши Жаҳонгир Зуфаровга тегишли экани, компания 2021 йил 1 январда ташкил этилгани кўрсатилган.