Россия Мудофаа вазири Сергей Шойгу ҳарбий хизмат учун ёш чегарасини босқичма-босқич оширишни таклиф қилди. Бу ҳақда «Коммерсантъ» хабар берди.
У ҳарбий хизматга қабул қилишни 18 ёшдан 21 ёшгача, ёш чегарасини эса 27 ёшдан 30 ёшгача оширишни илгари сурди.
«Россия қуролли кучлари сонини 1,5 миллион кишига, шу жумладан, 670 минг контракт аскарига етказиш керак. Ихтиёрий равишда шартнома тузишни хоҳловчиларга хизматнинг биринчи кунидан бошлаб бу имконият берилиши керак», — дейди Шойгу.
Шунингдек, у яна бир қанча таклифлар ҳам билдирди. Жумладан, у қуролли кучларнинг иккита ўзига хос стратегик ҳудудий бирлашмаларини — Москва ва Ленинград ҳарбий округларини яратишни ёқлади.
«НАТОнинг Россия чегаралари яқинида ҳарбий салоҳиятни ошириш истагини ҳисобга олиб, мамлакат шимоли-ғарбида қўшинлар гуруҳини яратиш чораларини кўриш зарур», — дейди вазир.
20 декабрь куни Британия разведкаси Украинадаги қатор ҳарбий муваффақиятсизлик сабабли Путин ўзини жавобгарликдан соқит қилишга уринаётганини маълум қилганди. Вазирлик бунга Украинага бостириб киришда масъул бўлган бирлашган штабнинг яқинда ўтказилган йиғилишини мисол қилиб келтирган.
Хусусан, Путин Россия олий ҳарбий раҳбарияти, жумладан, мудофаа вазири Сергей Шойгу ва Россиянинг Украинадаги қўшма кучлари гуруҳи қўмондони Сергей Суровикин билан учрашганди. Учрашувда Кремль раҳбари кейинги жанговар ҳаракатлар стратегиясига ўзгартириш киритишни таклиф қилган. Британия разведкачиларининг фикрича, бу Путинни Россия Қуролли кучларининг Украинадаги қатор ҳарбий муваффақиятсизликлари учун жавобгарликдан соқит қилишга қаратилган.
Изоҳ (0)