Кеча, 20 декабрь куни президент Шавкат Мирзиёевнинг Олий Мажлисга мурожаатидан сўнг Олий ва ўрта махсус таълим вазири Абдуқодир Тошқулов журналистларга интервью берди.
Абдуқодир Тошқуловнинг айтишича, олий таълим коррупциядан холи бўлган соҳалардан бирига айланди.
«Муҳтарам президентимиз таълимни умуммиллий ҳаракатга айлантириб бўлдилар. Таълим билан фақат таълим тизими ва вазирликлари эмас, ҳамма, жамоатчилик, мана сиз ҳам (журналистга қараб — таҳр.) дарсга кириб ўтиришга ҳаққингиз бор. Марҳамат, киринг, 80 дақиқа дарсни таҳлил қилиб, ОАВда ёритинг. Ўйлайманки, ҳамма пойдеворлар ва шароитлар қилинган. Бу соҳа (таълим) коррупциядан ҳоли бўлган, фақат энди ҳамма бирдек ишлаши керак», — деди вазир.
Аввалроқ Тошқулов олий таълимда коррупция мавжуд деган тушунча нафақат жамият ва халқда, балки аксарият раҳбариятда ҳам борлигини таъкидлаган.
«Олий таълимда коррупция мавжуд деган тушунча нафақат жамият ва халқда, балки аксарият раҳбариятда ҳам бор. Лекин мен шу тизимдаги раҳбар сифатида айтаманки, (коррупция — таҳр.) баробарларга камайиб кетди. Минг афсус, энди атрофда фирибгарлар кўпайди. Мана, шу ерга келгунча матбуот хизмати раҳбари менга бешта ҳолат ташлаб берди. Қашқадарёда умуман университетга алоқаси йўқ одам ўқишингни кўчириб бераман, деб 3 мингдан 6 минг долларгача пора олган, водийда пора олган. Энг муҳими, кейинги вақтлар ўқитувчилар эмас, котиба, ёрдамчи, лаборант, талаба бу ишга аралашиб кетяпти. Шунинг учун сиздан илтимос, бу кимгадир бориб тақалмаса, улар бундай қилмайди, уларнинг ҳаммасиям фирибгар эмас, ўзингизни йиғиштириб олинг», — деган вазир.
Шунингдек, у сўровларда 65 фоиз одам олий таълимга ишонмаслиги аниқлангани ва ушбу кўрсаткич нолга тенг бўлиши кераклигини айтган.
Изоҳ (0)