19 декабрга ўтар кечаси Киевга камикадзе дронларидан ҳужум қилинди. Украина пойтахти мери Виталий Кличко шаҳарнинг Соломенский ва Шевченкивский туманларида бир неча портлаш содир бўлганини маълум қилди.
Шаҳар ҳарбий маъмурияти раҳбари Сергей Попконинг сўзларига кўра, Киев ҳаво ҳудудида Эронда ишлаб чиқарилган йигирмадан ортиқ «Shahed» учувчисиз учоқлари қайд этилган. Ҳаво ҳужумидан мудофаа тизимлари 15 га яқин дронни уриб туширди. Ҳужум оқибатида муҳим инфратузилма объектларига зарар етди.
Киев вилояти маъмурияти ҳам ҳужум чоғида хусусий уйларга зарар етганини маълум қилди. Дастлабки маълумотларга кўра, икки киши жароҳатланган.
Ҳужум муносабати билан Киевда электр энергияси фавқулодда ўчириш бошланди.
Октябрь ойи бошидан бери Россия Мудофаа вазирлиги Украинанинг ҳарбий ва энергетика инфратузилмасига мунтазам ракета зарбалари бериб келмоқда. Ҳужумларда Россия Эрондан сотиб олган дронлардан ҳам фойдаланмоқда.
17 октябрь куни Киевга дронлар ҳужуми оқибатида турар жой биноси вайрон қилинган ва бир неча тинч аҳоли ҳалок бўлган эди.
Изоҳ (0)