«Келаси йили 4,5 млрд доллар ташқи қарз жалб қилмоқчимиз» — Тимур Ишметов

Ўзбекистон 2023 йилда 4,5 миллиард доллар ташқи қарз жалб қилмоқчи. Бу ҳақда молия вазири Тимур Ишметов бугун, 19 декабрь куни бўлиб ўтаётган Олий Мажлис Қонунчилик палатаси мажлисида маълум қилди.

Тимур Ишметовнинг айтишича, олинадиган қарзнинг 2,5 миллиард доллари давлат бюджетини молиялаштириш учун сарфланади.

«Ўтган йили ташқи қарзни йиллик 4 миллиард доллар оламиз деб режа қилган эдик. Лекин пандемия бошланди. Шу сабабли қарз миқдорини 5 миллиард долларга оширишга тўғри келди. Кейинги йили қарз олишни 4,5 миллиард долларга туширишни режа қилганмиз. Бюджет тақчиллигининг энг юқори кўрсаткичи 3 фоиз бўлиши керак. Бу дефицитни қоплаш учун ташқи қарз олишни ҳам камайтирамиз дегани. Келаси йили олинадиган 4,5 миллиард доллардан 2,5 миллиард доллари бюджетни молиялаштиришга ишлатилади», – деди вазир.

Аввалроқ Ўзбекистоннинг давлат қарз қолдиғи 2022 йилнинг 1 июль ҳолатига кўра, 26 миллиард долларни ташкил қилганди. Бунда мамлакатнинг ташқи қарзи 23,36 миллиард доллар бўлган бўлса, ички қарз 2,77 миллиард доллар бўлган.