«Толибон» Покистон аскарлари ва тинч аҳолига қарата артиллериядан ўт очди (видео)

«Толибон» ва Покистон ҳарбийлари ўртасида 15 декабрь куни Спинболдак—Чаман чегарасида тўқнашув юз берди. Бу ҳақда Hasht-e Subh Daily хабар берди.

Қандаҳордаги манбаларга кўра, томонлар ўртасидаги уруш «Толибон» чегарада пост ўрнатмоқчи бўлганидан кейин бошланган. Покистон аскарлари объектнинг ўрнатилишига тўсқинлик қилган. Покистон матбуоти «Толибон» чегара кучлари Чаман шаҳридаги тинч аҳоли пунктини бир неча марта артиллериядан ўққа тутганини хабар қилмоқда.

Оқибатда бир нафар тинч фуқаро ҳалок бўлган, 15 киши эса яраланган. Покистон чегарага ҳужумчи вертолётлар юборган ва Кобулдаги элчихона ходимларини эвакуация қилган.

Қандаҳордаги Спинболдак касалхонаси расмийларининг айтишича, шу пайтгача ушбу можародан икки ярадор шифохонага ётқизилган.

Эслатиб ўтамиз, 11 декабрда ҳам «Толибон» ва Покистон ҳарбийлари ўртасида тўқнашув юз берганди. Тўқнашув «Толибон» чегара кучлари Дуранд линияси яқинида янги пост қуришни режалаштирганидан кейин бошланган.

Тўқнашувда 5 киши ҳалок бўлган, 20 киши жароҳатланган. Покистондаги бир қанча бинолар вайрон қилинган.

Мавзуга доир: Кобулда хитойликлар бўлган меҳмонхонага ҳужум қилинди (видео)