Twitter ижтимоий тармоғи эгаси, Tesla ва SpaceX асосчиси Илон Маск @ElonJet Twitter-аккаунти эгаси, 20 ёшли Жек Суинини судга берганини маълум қилди. У бизнесмен самолётининг ҳаракатлари ҳақида ахборот эълон қилган.
Маскнинг сўзларига кўра, яқинда Лос-Анжелесда бўлиб ўтган воқеадан кейин у судга мурожаат қилган. У ерда «ақлдан озган сталкер» бизнесменнинг ўғлини бироз вақт давомида таъқиб қилган — уни Илон Маск деб ўйлаган, сўнг унинг машинаси йўлини тўсиб қўйиб, капотга чиққан.
Ҳодисадан кейин Маск Twitter’да фойдаланувчиларнинг жойлашган жойи ҳақида реал вақт режимида маълумот берувчи ҳар қандай ҳисоб ёпиб қўйилишини, чунки бу одамларнинг жисмоний хавфсизлигига таҳдид солишини маълум қилди. Шунингдек, у унинг оиласига зарар етказилишини қўллаб-қувватлаган аллақандай ташкилотларни судга берганини қўшиб қўйди.
Маск судлашмоқчи бўлаётган Жек Суинининг ўзи BBC News’га маълум қилишича, унинг бизнесменнинг ўғли билан юз берган воқеага алоқаси йўқ. Шунингдек, унинг айтишича, Twitter’да ярим миллион обуначиси бўлган саҳфаси 14 декабрь куни ёпиб қўйилган. Бундан ташқари, Суини CNN’га айтиб беришича, бир йил аввал Маск унга мурожаат қилиб, @ElonJet аккаунтини ўчириб ташлашни сўраган. Унинг сўзларига кўра, ўшанда бизнесмен унга беш минг доллар таклиф қилган, у эса 50 минг доллар сўраган ва Маск рад жавоби берган.
BBC News ёзишича, Суини Microsoft таъсисчиалридан бири Билл Гейтс, Amazon асосчиси Жефф Безос ва Мета бош директори Марк Цукерберг каби машҳурларнинг парвозларини кузатиб борган бошқа ўнлаб аккаунтларга ҳам масъул бўлган. Бундан ташқари, Суини Россия президенти Владимир Путин учган эҳтимолий самолётларни ҳам кузатган. Бу аккаунтларнинг аксарияти ҳам блоклаб қўйилган.
2022 йил кузида Илон Маск Twitter’нинг ягона эгасига айланди, шундан кейин компанияда ислоҳотлар бўлиб ўтди, натижада ходимлар оммавий равишда ишдан кетди ва ижтимоий тармоқ Ишида ҳам турли ўзгаришлар юз берди. Маск яқин ойлар ичида Twitter «кўплаб аҳмоқона нарсалар»ни қилиши ҳақида огоҳлантирди. «Биз иш берган нарсаларни қолдириб, ишламайдиганларини ўзгартирамиз», — деди бизнесмен.
Изоҳ (0)