«Дарё» подкасти. Портрет саҳифаси

«Дарё» интернет нашрининг ушбу лойиҳаси эндиликда ўқувчиларга муҳим маълумотларни нафақат ўқиш, балки тинглаш орқали етказишни мақсад қилди. Матн тили содда ва аудио шакли махсус мусиқалар билан бойитилган.

Бизни бу ердан тингланг: Портрет саҳифаси 

1-портрет

Ўзбек олимаси Азизова Юлдуз Сайфуллаевна 1940 йил 14 декабрда Тошкентда таваллуд топган. Тошкент давлат университетининг шарқ факультети, араб мамлакатлари тарихи бўлимини тугатади.

1969-1971 йилларда Покистонга хизмат сафарида бўлгач, «Иккинчи жаҳон урушидан кейинги Англия-Саудия муносабатлари» мавзусида номзодлик диссертациясини ҳимоя қилади.

Олима Юлдуз Азизова 30 дан ошиқ илмий мақола ва рисолалар муаллифи бўлиб, унинг мақолалари хорижнинг турли журнал ва тўпламларида чоп этилган.

Масаланинг энг муҳим томони олима ёзган илмий материаллар мавзуси ҳозирда жамиятимиз қидираётган бир қатор саволларга ҳам жавоб беради.

Қуйида улар билан танишишингиз мумкин:

1. 1967 йилги Яқин Шарқ инқирозининг иқтисодий жиҳатлари (брошюра)
2. Яқин Шарқ: нефть ва сиёсат. (Ю.Пономарев билан ҳаммуаллифликда)
3. Яқин Шарқ ва империалистик сиёсат. (Б.Мусаев билан ҳамкорликда)
4. Саудия аёли: жамиятни модернизация қилиш жараёнларининг таъсири ва ислом динининг ўрни.
5. Меҳнат ҳаракатининг шаклланиши ва ривожланиши .

Ушбу иқтисодий, ижтимоий , илмий материаллар хориж тилида нашр этилган. Сизнинг фикр ва таклифларингизни ўрганган ҳолда ўқувчиларни юқоридаги мақолалар билан ўзбек тилида таништириб борамиз.

2-портретЗамондошлари томонидан ажойиб шоумен ва энг соф романтик анъанадаги кинорежиссёр деб аталган Раж Капур ўзининг фильмларида муҳим ижтимоий мавзуларни кўтарган.

1940 йилларда Болливуд продюсерлик студияларида таҳсил олгач, 24 ёшида RK Films компаниясини очган ижодкор: продюсерлик, режиссёрлик ва актёрлик фаолиятини бирдек эгаллаган.

«Аваара хун» қўшиғи орқали Шарқда кўп йиллардан бери машҳур «Дайди» кинофильми комедия ва севги саҳналарини ўзида мужассам этган ҳолда шахснинг ахлоқий асоси нимадан иборат, деган саволга жавоб қидиради.

«Жаноб 420» фильмида эса Раж Капур қашшоқлик, ишсизлик ва янги Ҳиндистон давлатидаги миллий ғурур масалаларини кўтариб чиқди.

Шу билан бирга, маҳоратли режиссёр ўз асарларида томошабинларининг романтик сюжетга қизиқишини ҳам сақлаб қола олди. Ҳа, унинг фильмларидаги оҳангларда инқилобий руҳ бўлмаган ва мана шу жозибадорлиги орқали томошабинларда ижтимоий адолатсизликларни енгиш қобилиятини шакллантирган.

Раж Капур инсоннинг курашлари охир-оқибат севги ва ғамхўрлик қилиш истагига олиб келади, деб ҳисоблайди. Унинг бундай қарашларига машҳур актёр Чарли Чаплин ижодига бўлган ҳайрати ҳам сабаб бўлган, албатта.

Масалан, Капурнинг ўзига хос «индивидуал қобилияти»ни очган «Дайди» ва «Жаноб 420» кинофильмларида устози Чарли Чаплиндаги ижодий руҳ сезилиб туради.

#Daryo подкасти#Portret саҳифаси

Муаллиф ва бошловчи: Ойсанам Ғуломжонова

Таклиф ва мулоҳазаларингиз биз учун муҳим