Олий суд матбуот хизматининг маълум қилишича, 13 декабрь куни блогер Олимжон Ҳайдаровга нисбатан юритилган маъмурий ҳуқуқбузарлик тўғрисидаги иш кўриб чиқилди.
Қайд этилишича, жиноят ишлари бўйича Ўзбекистон тумани судида Маъмурий жавобгарлик тўғрисидаги кодекснинг 201-моддаси (йиғилишлар, митинглар, кўча юришлари ёки намойишлар уюштириш, ўтказиш тартибини бузиш) 1-қисми ва 202-2-моддаси (ёлғон ахборот тарқатиш) 2-қисмида назарда тутилган маъмурий ҳуқуқбузарлик ҳаракатлари бўйича блогер Олимжон Ҳайдаровга нисбатан иш кўрилган.
Суднинг қарори билан Ҳайдаров Маъмурий жавобгарлик тўғрисидаги кодекснинг юқорида кўрсатилган моддаларида назарда тутилган маъмурий ҳуқуқбузарликларни содир этган деб топилиб, унга мазкур кодекснинг 34-моддаси (бир неча ҳуқуқбузарликни содир этганлик учун маъмурий жазо қўллаш) тартибида базавий ҳисоблаш миқдорининг 70 баравари (21 000 000 сўм) миқдорида жарима солинди.
Маълумот учун, Фарғонада аҳолига газ етказиб бериш учун корхоналар газдан узилганини била туриб норозилик уюштирган ишчилар қамалгани ҳақида хабар берилганди.
29 ноябрь куни туман газ идораси масъул ходимлари томонидан Albus заводига уланган газ тармоғи текширилганда ушбу завод ўзбошимчалик билан қайтадан газ тармоғига ноқонуний уланиб олгани аниқланган ва далолатнома тузилиб, газ қувуридан яна бир бор кесиб қўйилган.
Юзага келган объектив мураккаб шароитни тўғри тушунган ҳолда Albus Cement Group’дан ташқари бошқа юқоридаги корхоналар муқобил ёқилғи (кўмир)га ўтган. Шундай бўлса-да, газ етказиб беришдаги объектив ҳолатдан завод директори, бошқарувчиларнинг ҳам тўлиқ хабари бўлиб туриб, 6 декабрь куни завод иш юритувчиси А.Т. ва 20 га яқин ишчи завод фаолияти тўхтаганлигидан норозилигини билдириш учун олдиндан қилинган режа ва таклиф қилинган учинчи шахслар иштирокида намойиш ташкиллаштирилган.
Ушбу намойишда ходимлар келишувга кўра атайин эҳтиросли сўзлар, чалғитувчи гаплар ва кескинлик ёрдамида, шунингдек, ҳақиқатга тўғри келмайдиган ахборотлар орқали ўз мурожаатларини етказган ва видеомурожаат олдиндан ушбу ҳолатни тасвирга олишга таклиф қилинган инсонлар иштирокида Telegram’даги «Олимжон Ҳайдаров» каналида эълон қилинганди.
Аввалроқ ҳам — 2022 йилнинг июль ойида Фарғона вилоятида фаолият юритувчи блогер Олимжон Ҳайдаров 15 суткага қамалгани ҳақида хабар берилганди. Кейинроқ вилоят судларининг маълумот беришича, у икки кундан сўнг жазодан озод қилинган.
Изоҳ (0)