Туркманистон президенти Сердар Бердимуҳамедов жаҳон интернет тармоғи билан боғлиқ бўлмаган миллий рақамли тармоқ яратиш концепциясини ишлаб чиқиш бўйича комиссия тузиш ҳақида қарор имзолади. Бу ҳақда Туркманистон ОАВлари хабар бермоқда.
Ушбу ҳужжатга мувофиқ, комиссия таркиби тасдиқланди, у автоном миллий рақамли тармоқ яратишга қаратилган тизимли чораларни қабул қилиш билан шуғулланади.
Қайд этилишича, Туркманистонда иш ва ҳордиқ учун мўлжалланган маҳаллий иловалар, сайтлар ва платформаларни ишлаб чиқиш фаол тарзда амалга оширилмоқда.
Миллий рақамли тармоқ қачон яратилиб, қачон ишга туширилиши борасида аниқ маълумотлар йўқ. Шунингдек, ўз интернетига эга бўлгач, жаҳон интернет тармоғидан узиб қўйиш имконияти ҳақида ҳам ҳеч нарса маълум эмас.
Қайд этиш керакки, Туркманистонда фуқароларнинг интернетга уланиши ниҳоятда чекланган. Мамлакатда ижтимоий тармоқ саҳифалари ва VPN сайтлари блокланган. Пул эвазига телефонларга VPN ўрнатган усталар ҳибсга олинган.
Изоҳ (0)