Қирғизистон президенти Садир Жапаров Германиядан давлат бюджетига сотиб олинган Airbus H145 вертолётини синовдан ўтказиш жараёнида кийган курткаси муҳокамага сабаб бўлди. Бу ҳақда Kaktus media хабар берди.
Авиатехника синовида президент ва Миллий хавфсизлик давлат қўмитаси хизмати раҳбари Қамчибек Ташиев қиммат бренд кийимларида омма олдига чиққани аниқланган. Самолёт тақдимотида Ташиевнинг эгнида Moncler брендининг Bauges моделига жуда ўхшаш куртка бўлган. Moncler веб-сайтида унинг нархи 1590 евро ёки 142 506 сом экани келтирилади.
Садир Жапаров эса Лоро Пиана брендининг мўйнали курткасида кўриниш берган, «Vipavenue.ru» сайтида унинг нархи 14 177 евро эканини кўриш мумкин.
8 февралда ҳам Қирғизистон президенти пойтахт бозорларидаги тадбиркорлар билан назорат-касса машиналарини жорий этиш юзасидан мулоқот ўтказганда кийган курткаси муҳокамаларга сабаб бўлганди. Ижтимоий тармоқларда президентнинг курткаси Италиянинг «Stefano Ricci» брендидан бўлиб, унинг нархи 5900 доллар экани ҳақида маълумот тарқалган.
Бундан аввал ҳам Садир Жапаров ва унинг рафиқаси Ойгул Жапарованинг қимматбаҳо чанғи либоси муҳокамаларга сабаб бўлганди. Уларнинг устидаги либослари қимматбаҳо маркали курткаларга жуда ўхшашлиги айтилган.
Тахминларга кўра, президент эгнидаги куртка «Lynn» брендига тегишли бўлиб, 105 минг сом (тахминан 13 миллион сўм) туради. Биринчи хонимнинг устидаги куртка эса «Toni Sailer» брендига тегишли бўлиб, нахри тахминан 140 минг сомни (тахминан 20 миллион сўм) ташкил қилган.
Изоҳ (0)