Мелитопол ўққа тутилди. Украина томони 200 россиялик йўқ қилинганини айтса, оккупацион ҳукумат тинч аҳолидан иборат дам олиш маркази зарбага учраганини даъво қилмоқда

Россия томонидан аннексия қилинган Мелитопол ҳудудига 10 декабрь куни кечқурун зарба берилди. Мелитополнинг украиналик мери Иван Федоров шаҳар шарқи ва жанубида кучли ёнғинлар юз бергани ҳақида ёзди. Унинг сўзларига кўра, зарба, хусусан, россиялик ҳарбийлар йиғилган жойга берилган, 200 нафар россиялик ҳалок бўлган. Ярадорларни ташиш учун Қримдан тез ёрдам машиналарини жалб қилишга тўғри келди, деб қўшимча қилган Федоров.

Аннексия қилинган Запорожье вилоятининг Россия томонидан тайинланган раҳбари Евгений Балицкий Мелитополга зарба берилганини тасдиқлади. Унинг сўзларига кўра, дам олиш базаси ўққа тутилган, у ерда «база ходимлари ишлаётганди, шанба куни кечқурун одамлар, тинч фуқаролар кечки овқатни еган». Балицкийнинг сўзларига кўра, икки киши ҳалок бўлгани ва ўн киши яралангани маълум.

Ўз навбатида, Запорожье вилояти маъмуриятининг Россия томонидан тайинланган вакили Владимир Рогов Мелитополдаги «Овчилар тўхташ жойи» дам олиш базаси HIMARS ракета тизимларидан ўққа тутилганини айтди. Иккита украин ракетаси уриб туширилган, қолганлари нишонга етиб борган, деб ёзади «РИА Новости» Роговнинг баёнотига таяниб.

Украина Қуролли кучлари қўмондонлиги Мелитополнинг ўққа тутилгани юзасидан ҳозирча изоҳ бермади.