Британия Мудофаа вазирлиги: 2023 йилда Россиянинг ҳарбий харажатлари мамлакат бюджетининг қарийб учдан бирига тенг бўлади

Буюк Британия Мудофаа вазирлиги Украинадаги урушнинг бориши ҳақидаги кунлик ҳисоботини Россияда ҳарбий харажатларнинг кескин ошишига бағишлади.

Россия президенти 5 декабрь куни имзолаган 2023 йилги федерал бюджет тўғрисидаги қонун армия, хавфсизлик хизматлари ва полицияга тўққиз триллион рублдан (143 миллиард доллар) ортиқ маблағ сарфлашни назарда тутади. Британиялик мутахассисларнинг таъкидлашича, бу ўтган йиллардагидан сезиларли даражада кўп ва Россия умумий бюджетининг 30 фоиздан ортиғини ташкил қилади.

Буюк Британия Мудофаа вазирлиги Россия томонидан 2023 йил учун тақдим этилган бюджетни унда прогноз қилинган даромад ва харажатлар нуқтаи назаридан «жуда оптимистик» деб ҳисобламоқда. Шу муносабат билан, дейилади ҳисоботда, уруш харажатларини қўллаб-қувватлаш зарурати туфайли Россия бюджетининг ноҳарбий қисмларига янада кўпроқ юк тушиши мумкин.

Россия бюджетида ҳарбийларга тегишли харажатлар турли моддаларга бўлинган. Бундан ташқари, бюджет моддаларининг баъзилари одатда сир сақланади.

Ноябрь ойи охирида Россия мудофаа вазири Сергей Шойгу давлат мудофаа буюртмасини молиялаштириш «қўшимча ажратилган бюджет маблағларини ҳисобга олган ҳолда» 2023 йилда қарийб бир ярим бараварга ошишини айтди. У харажатларнинг ушбу бандига бюджетдан қанча маблағ ажратилиши режалаштирилганига аниқлик киритмади.

Forbes журналининг украин хизмати Украина Қуролли кучлари маълумотларига таяниб, хабар беришича, Россиянинг Украинага бостириб киришидан кейинги тўққиз ой ичида Россия урушга 82 миллиард доллар сарфлаган, бу унинг йиллик бюджет даромадларининг чорак қисмига тенг. Forbes украиналик ҳарбийлар тақдим этган очиқ маълумотларга асосланиб ҳисоб-китоб қилган. Уруш шароитида бу маълумотларни тезда текшириш имконсиз.