«Баъзи йигитларнинг онаси ‘Ё мени танла, ё аёлингни’, деб танлов қўйяпти. Аслида онанинг шундай шарт қўйиши гуноҳ» — Нуриддин Холиқназаров

Ўзбекистон мусулмонлари идораси раиси, муфтий Нуриддин Холиқназаров ижтимоий одоблар, хусусан, оилалардаги қайнона-келин муносабатлари ҳақида маълумот берди.

Унинг сўзларига кўра, кейинги пайтларда авваллари учрамаган, ҳатто эшица ҳайрон қолиш мумкин бўлган воқеалар учрамоқда. Оилалардаги муаммоларнинг аксарияти қайнона ва келин ўртасида бўлмоқда.

Қайнона ким, келин ким — аслида шу саволларга жавоб топиш керак. Аввалги даврларга қарасак, қайноналар келинларига онадек муносабатда бўлган. Аслида Ислом тарбияси ҳам шундай. Агар ким катталарни ҳурмат қилмас экан, катталар эса кичикларга раҳм қилмас экан, у бизнинг уммат сафида эмас, деяпти пайғамбар алайҳиссалом. Шу ҳадиснинг ўзиёқ қайнона-келин муносабатларини ислоҳ қилиши керак.

Охирги пайтларда келин олишдаги муомалаларда қайноналар томонидан ҳам анча нуқсонлар кўриниб келмоқда. Оилаларнинг можаросини ўрганганимизда ажрашишларнинг 50 фоиздан кўпига қайнона ва келин можаролари сабаб бўляпти. Уларнинг иккиси ҳам ўзини ҳақ деб билиб, ораларида кескинлик туғиляпти.

Қайнона келин олаётган пайтдаёқ ниятини яхшилаши керак. Келин эмас, худдики уйга хизматкор келаётгандек хаёл қилиш ёки ўз қайнонасидан кўрган зулмни келинига кўрсатишни мақсадига айлантирмаслиги керак. Уйига келин келганидан кейин эса ўзининг келинлик даврини эслаши, бир вақтлар ўзи ҳам хатоларга йўл қўйганини ёдга олиб, келинидан ҳамма нарсани уддалашини кутмаслиги керак.

Қайнона келинига она сифатида қараши зарур, ахир келиннинг уйига совчи бўлиб борилганда қанча ваъдалар берилади? У ваъдалар қаерга кетди? Баъзи йигитлар онаси «Ё мени танла, ё аёлингни», деб танлов қўяётганини айтяпти. Бу — жуда қийин танлов. Аммо йигитчилик, урф-одат, диний таълим борлиги учун аёлини яхши кўрса-да, фарзандларига меҳр кўрсаца-да, онасини танлайди. Аслида, онанинг шундай шарт қўйиши — гуноҳ. Чунки бир оилани бузишдан каттароқ гуноҳ йўқ, — дейди муфтий.

Мавзуга доир:

• «Ҳозир ҳамманинг ўз ‘шайхи’ бор Google деган. Ёзяпмиз, жавоби чиқса, мана шу тўғри деб ўйлаяпмиз» — Нуриддин Холиқназаров
• «Аллоҳ исроф қилгувчиларни яхши кўрмайди. Ҳаммаси учун жавоб берамиз» — Муфтий Нуриддин Холиқназаров
• «Коррупционэрларни лаънатлаймиз, лекин уларни порахўр қилаётган биз ўзимиз-ку» — Муфтий Нуриддин Холиқназаров