“Ba’zi yigitlarning onasi ‘Yo meni tanla, yo ayolingni’, deb tanlov qo‘yyapti. Aslida onaning shunday shart qo‘yishi gunoh” — Nuriddin Xoliqnazarov

O‘zbekiston musulmonlari idorasi raisi, muftiy Nuriddin Xoliqnazarov ijtimoiy odoblar, xususan, oilalardagi qaynona-kelin munosabatlari haqida ma’lumot berdi.

Uning so‘zlariga ko‘ra, keyingi paytlarda avvallari uchramagan, hatto eshitsa hayron qolish mumkin bo‘lgan voqealar uchramoqda. Oilalardagi muammolarning aksariyati qaynona va kelin o‘rtasida bo‘lmoqda.

Qaynona kim, kelin kim — aslida shu savollarga javob topish kerak. Avvalgi davrlarga qarasak, qaynonalar kelinlariga onadek munosabatda bo‘lgan. Aslida Islom tarbiyasi ham shunday. Agar kim kattalarni hurmat qilmas ekan, kattalar esa kichiklarga rahm qilmas ekan, u bizning ummat safida emas, deyapti payg‘ambar alayhissalom. Shu hadisning o‘ziyoq qaynona-kelin munosabatlarini isloh qilishi kerak.

Oxirgi paytlarda kelin olishdagi muomalalarda qaynonalar tomonidan ham ancha nuqsonlar ko‘rinib kelmoqda. Oilalarning mojarosini o‘rganganimizda ajrashishlarning 50 foizdan ko‘piga qaynona va kelin mojarolari sabab bo‘lyapti. Ularning ikkisi ham o‘zini haq deb bilib, oralarida keskinlik tug‘ilyapti.

Qaynona kelin olayotgan paytdayoq niyatini yaxshilashi kerak. Kelin emas, xuddiki uyga xizmatkor kelayotgandek xayol qilish yoki o‘z qaynonasidan ko‘rgan zulmni keliniga ko‘rsatishni maqsadiga aylantirmasligi kerak. Uyiga kelin kelganidan keyin esa o‘zining kelinlik davrini eslashi, bir vaqtlar o‘zi ham xatolarga yo‘l qo‘yganini yodga olib, kelinidan hamma narsani uddalashini kutmasligi kerak.

Qaynona keliniga ona sifatida qarashi zarur, axir kelinning uyiga sovchi bo‘lib borilganda qancha va’dalar beriladi? U va’dalar qayerga ketdi? Ba’zi yigitlar onasi “Yo meni tanla, yo ayolingni”, deb tanlov qo‘yayotganini aytyapti. Bu — juda qiyin tanlov. Ammo yigitchilik, urf-odat, diniy ta’lim borligi uchun ayolini yaxshi ko‘rsa-da, farzandlariga mehr ko‘rsatsa-da, onasini tanlaydi. Aslida, onaning shunday shart qo‘yishi — gunoh. Chunki bir oilani buzishdan kattaroq gunoh yo‘q, — deydi muftiy.

Mavzuga doir:

• “Hozir hammaning o‘z ‘shayxi’ bor Google degan. Yozyapmiz, javobi chiqsa, mana shu to‘g‘ri deb o‘ylayapmiz” — Nuriddin Xoliqnazarov
• “Alloh isrof qilguvchilarni yaxshi ko‘rmaydi. Hammasi uchun javob beramiz” — Muftiy Nuriddin Xoliqnazarov
• “Korrupsionerlarni la’natlaymiz, lekin ularni poraxo‘r qilayotgan biz o‘zimiz-ku” — Muftiy Nuriddin Xoliqnazarov