Арманистон ҳукумати 3 август куни Еревандаги Республика стадионида бўлиб ўтадиган Женнифер Лопес концерти учун 7 миллион доллар ажратди.
Ереван вице-мери Армен Памбухчян хонанда Лопеснинг концерт беришига ўз муносабатини билдирди ва Арманистон пойтахтида бўлиб катта шоу учун сарфланган харажатлар ўзини тўлиқ оқлашини маълум қилди. Унинг баёноти “Спутник Армения” нашрида берилди.
Памбухчяннинг айтишича, 56 ёшли хонанданинг концертига тахминан 15 минг нафар хорижлик мухлислар келиши кутилмоқда ва уларнинг аксарияти бир муддат Ереванда бўлади.
“Сайёҳларнинг ўртача харажатларини ҳисоблаб чиқайлик: чипта, яшаш, овқатланиш ва ҳордиқни ҳисобга олсак, ҳар бир меҳмон мамлакат иқтисодиётига камида 500 доллар келтиради. Мазкур концерт глобал аудитория орасида Арманистон имижи ва обрўсини кўтаришда ҳам алоҳида ўрин тутади”, деди Памбухчян
“15 000 × 500 = 7 500 000. Хуш келибсан, Жей Ло. Ишонамизки, Арманистондан катта таассуротлар билан кетасан”, дея таъкидлади у.
Аввалроқ Женнифер Лопес ўнлаб мамлакатларни қамраб оладиган Up All Night: Live in 2025 катта концерт турини эълон қилгани, улар орасида биринчи марта Ўзбекистон ҳам борлиги ҳақида хабар берилганди. Шоу дастури 7 август куни Тошкентдаги “Бунёдкор” стадионида бўлиб ўтади.
Женнифер Лопеснинг ўнлаб мамлакатларни қамраб оладиган Up All Night: Live in 2025 катта концерт тури АҚШ, Европа, Осиё, жумладан, Қозоғистон, Арманистон ва Ўзбекистонда бўлиб ўтади.
Маълумот учун: Женнифер Лопес 1969 йил 24 июль Нью Йорк шаҳрида дунёга келган америкалик актриса, қўшиқчи, раққоса, моделер, продюсер ва ишбилармон аёл. У биринчи марта 1991 йилда In Living Color телекўрсатувида Fly Girl раққосаси сифатида машҳурликка эришган. У 1993 йилгача актрисалик фаолиятини бошлашга қарор қилгунга қадар жамоанинг доимий аъзоси бўлиб қолган. Лопес ўзининг биринчи бош ролини 1997 йилда қўшиқчи Селена ҳақидаги биографик фильмда ижро этган. Бу рол унга “Олтин глобус” номинациясини олиб келган.
Изоҳ (0)