Эрон ҳукумати 3 август куни мамлакатда янги Миллий мудофаа кенгаши ташкил этилганини эълон қилди. Давлат ОАВга кўра, тузилманинг вазифаси мудофаа режалари ва қуролли кучлар салоҳиятини марказлаштирилган тарзда баҳолашдан иборат бўлади. Бу ҳақда форс нашрларига таяниб, Al Arabiya хабар берди.
Маълум қилинишича, янги тузилма Эрон президенти Масъуд Пезешкиён раҳбарлигида фаолият олиб боради. Кенгаш таркибига парламент спикери, Олий суд раҳбари, қуролли кучлар қўмондонлари ҳамда тегишли вазирликлар вакиллари киради.
Кенгаш тузилиши мамлакат конституциясининг 176-моддаси асосида, Олий миллий хавфсизлик кенгаши — Эроннинг олий хавфсизлик органи томонидан тасдиқланган. Айни пайтда, мамлакат армияси бош қўмондони Амир Ҳатами 3 август куни берган баёнотида Исроил томонидан билдирилаётган таҳдидларни ҳануз жиддий деб атаган.
“Душманнинг 1 фоизлик таҳдидини ҳам 100 фоизлик хавф деб баҳолаш керак. Таҳдидларни кам баҳоламаслигимиз ва душман ҳаракатларини тугади деб ҳисобламаслигимиз лозим,” деган Ҳатами.
Унинг айтишича, Эроннинг ракета ва дрон қудрати “операциялар учун доимий шай ҳолатда” сақланмоқда.
Маълумот учун, июнь ойида Исроил ва АҚШ томонидан Эрон ҳудудига жумладан, ядро иншоотларига қарши ҳужумлар уюштирилган эди. Бу воқеа “12 кунлик уруш” номи билан тилга олинади. Теҳрон бунга жавобан яҳудий давлатига қарши ракета ва дрон зарбалари билан жавоб берган. Шундан сўнг, бу уруш Вашингтон воситачилигида оташкесим келишуви билан якунланган. Исроил мудофаа вазири Кац июль ойида яна таҳдид бўладиган бўлса, Теҳронга қарши зарбалар давом эттирилишини билдирганди.
Изоҳ (0)