Илон Маск 1,5 миллиард Twitter аккаунти ўчирилишини эълон қилди

Яқин келажакда Twitter узоқ йиллар давомида тизимга кирмаган 1,5 миллиард аккаунтни ўчириб ташлайди. Бу ҳақда ижтимоий тармоқ эгаси, бизнесмен Илон Маск ўз саҳифасида хабар берди.

Twitter яқинда 1,5 миллиард аккаунт банд қилган жойни тозалай бошлайди. Гап йиллар давомида ҳеч қандай твит ёзмаган ва тизимга кирмаган аккаунтларни ўчириб ташлаш ҳақида кетмоқда, — деб тушунтирди у.

Илон Маск Twitter’ни сотиб олиш бўйича келишувни 27 октябрь куни якунлаб, компания учун 44 миллиард доллар тўлаган.

Шундан сўнг тадбиркор ижтимоий тармоқ ходимларининг ярмига яқинини ишдан бўшатди, қолганларни эса юқори интенсивлик билан ишлаш кераклиги ҳақида огоҳлантирди.

ОАВ хабарларига кўра, ушбу воқеалар фонида платформа фаолиятини сақлаб қолиш учун муҳим бўлган кўплаб ходимлар Twitter’ни тарк этган.

Аввалроқ Илон Маск нима сабабдан Twitter фойдаланувчилари сони камайиб бораётганини айтгани ҳақида хабар берилганди.