Россия Украинада уруш бошланганидан кейин Ғарб мамлакатлари томонидан киритилган санкцияларга қарамай, қанотли ракеталар ишлаб чиқаришда давом этмоқда. Conflict Armament Research (CAR — бутун дунё бўйлаб қуролли низолар чоғида қурол етказиб берилиши ҳақида маълумотлар тўплайдиган таҳлилчилар гуруҳи) таҳлилчилари шундай хулосага келди.
Тадқиқотчилар Россия қўшинлари 23 ноябрь куни Украинага ёппасига зарба бериш чоғида Киевга учирган ракеталар бўлакларини йиғиб олиб, ўрганиб чиқди. CAR гуруҳи 2022 йил ёзида ва кузида ишлаб чиқарилган иккита Х-101 қанотли ракеталари парчаларини аниқлади. Бўлакларда топилган код шундан дарак бермоқда.
Бундан аввалги тадқиқотларида CAR таҳлилчилари Россия илғор қурол-яроғларининг деярли барчаси хорижда ишлаб чиқарилган таркибий қисмлар ҳамда Америка ёки Европа компаниялари технологияларидан фойдаланган ҳолда яратилганини аниқлаганди.
Маъруза муаллифларидан бири тахмин қилишича, Россия ракеталар учун таркибий қисмларни санкцияларни айланиб ўтган ҳолда сотиб олиш усулини топган ёки бўлмаса, у уруш бошланишидан аввал бу таркибий қисмларнинг катта захирасини йиғиб қўйган.
АҚШ фикрича, Россия урушни давом эттириш учун ўқ-дорилар танқислигини бошдан кечирмоқда. Америкалик ҳарбий амалдор The New York Times’га маълум қилишича, Москва қурол-яроғларнинг ҳам эски, ҳам янги турларини қўллаши мумкин. Таҳлилчилар маълумотларига кўра, Россия ҳукумати ўқ-дорилар етишмовчилигини қоплаш учун мудофаа корхоналарида иш соатларини узайтирган бўлиши мумкин.
Россия Украинага бостириб киргач, Ғарб мамлакатлари РФга нисбатан бир қатор чекловлар киритди, шу жумладан, мамлакатга қурол ишлаб чиқаришда фойдаланилиши мумкин бўлган таркибий қисмлар ва технологияларни етказиб беришни тақиқлади. Баҳордан буён ОАВлар Россия санкциялар фонида урушни давом эттириш учун ўқ-дорилар етишмовчилигига дуч келган бўлиши мумкинлиги ҳақида вақти-вақти билан хабар бериб келмоқда.
Изоҳ (0)