Ўзбекистон бош вазири ўринбосари, энергетика вазири Жўрабек Мирзамаҳмудов бензин нархини асоссиз оширган, Аи-91, Аи-92 маркали бензин дея Аи-80 маркали бензи сотган АЁҚШлар бўйича муносабат билдирди.
«Бизнинг заводларда ишлаб чиқарилаётган ва етказиб берилаётган бензин у Аи-80 русумли бензин бўладими, Аи-92 бўладими, ё Аи-95 ми, сифати қаттиқ назорат қилинади. Бу борада истеъмолчиларга етказиб бериш жараёнида ҳам қандайдир ноқонуний ҳаракатлар бўлса, уни ҳам назорат қиламиз. Бу борада хабарлар тарқалганидан кейин биз нефть-инспекция ходимларини жойларга чиқарган ҳолда бензин сифатини назорат қилиш, нафақат сифатини, Монополияга қарши курашиш қўмитаси билан биргаликда унинг нархини ҳам назорат қилиш чораларини кўряпмиз», — деган у.
Энергетика вазирининг таъкидлашича, бензин нархини асоссиз ошириб юборган ёки сифатсиз бензин, ёхуд Аи-80 бензинини Аи-92 деб сотган АЁҚШларнинг лицензияси маҳрум қилиниши ҳам мумкин.
«Шуни таъкидлаб ўтмоқчиманки, бензин нархини асоссиз ошириб юборган ёки сифатсиз бензин, ёхуд Аи-80 бензинини Аи-92 деб сотган АЁҚШларга нисбатан албатта тегишли чоралар кўрилади. Сифатини қалбакилаштириш, Аи-80 бензинини Аи-92 бензин деб сотган АЁҚШлар листензиясини бекор қилишгача чоралар кўрилади», — дейди Жўрабек Мирзамаҳмудов.
Вазир, шунингдек, метан заправкалар чекланган муддатда ишлаётган пайтда бензинга талаб ортганини ҳисобга олган ҳолда унинг миқдорини ошириш чоралари кўрилаётганини ҳам қайд этиб ўтди.
«Албатта, савол туғилади, ҳозирги табиий газ танқислиги шароити, метан заправкалар чекланган муддатда ишлаётган пайтда бензинга талаб ортиб боради. Бу бўйича ҳам албатта чоралар кўриляпти. Жумладан, агар ҳозирги кунга қадар кунига 2,4 минг тонна Аи-80, яъни энг талаб юқори бензин сотувга чиқарилган бўлса, шу кунларда бензинга талаб ошганидан бошлаб бу кўрсаткич 3,5 минг тоннага етказилди», — деган у.
Изоҳ (0)