«Дарё» интернет нашрининг уч нафар журналисти «Ўзбекистон конституциясининг 30 йиллиги» эсдалик нишони билан тақдирланди. Эсдалик нишони бугун, 7 декабрь куни Миллий матбуот марказида бўлиб ўтган тадбирда Журналистлар уюшмаси раиси Олимжон Ўсаров томонидан топширилди.
Ўзбекистонда фаолият юритувчи босма оммавий ахборот воситалари вакиллари ҳамда интернет сайтларида фаолият юритувчи журналистлар йиғилган тадбирда сўз олган уюшма раиси Олимжон Ўсаров «Олтин суви юритилган ва шахсан президентимизнинг имзоси билан берилган медални қабул қилиб оляпсиз. Бу юртимизда оммавий ахборот воситалари вакиллари, шунингдек, соҳага бўлган эътибордан дарак», — деди.
Мазкур эътирофга «Дарё» интернет нашрида фаолият юритувчи журналистлар — Муножот Адилова, Отабек Қўлдошев ва Исломбек Умаралиевлар муносиб кўрилган.
«Ўзбекистон конституциясининг 30 йиллиги» эсдалик нишони конституция қабул қилинганининг ўттиз йиллиги муносабати билан таъсис этилган бўлиб, нишон билан мамлакат мустақиллигини мустаҳкамлаш, унинг иқтисодий, сиёсий, ижтимоий, илмий, маънавий салоҳиятини юксалтириш, мудофаа қудратини ошириш, давлат сарҳадлари дахлсизлигини таъминлаш, тинчлик ва барқарорликни, миллатлараро дўстлик ва тотувликни асраш каби вазифаларни амалга ошириб келаётган барча соҳа вакиллари, меҳнат фахрийлари, ҳарбий хизматчилар ва ҳуқуқни муҳофаза қилувчи органлар ходимлари ҳамда бошқа шахслар мукофотланиши мумкин.
Эсдалик нишонлари ва улар учун гувоҳномаларни тайёрлаш билан боғлиқ харажатлар Вазирлар Маҳкамасининг захира жамғармаси маблағлари ҳисобидан қопланиши белгиланган.
Изоҳ (0)