Баъзида кийим-кечак шкафида ёқимсиз ҳид пайдо бўлади. Бунинг сабаблари кўп бўлиши мумкин: ювилмаган кийимдан тортиб сифатсиз пойабзалгача. Ушбу муаммони бутунлай ҳал қилишга ёрдам берадиган бир неча усуллар мавжуд, деб ёзади Marie Claire.
Кийимларни кўздан кечиринг
Эҳтимол, гардеробда ювилмаган кийим ёки пойабзал бўлиши мумкин, бу эса ёмон ҳиднинг сабабчисидир. Бу ерда ягона ечим шкафни тўлиқ қайта кўриб чиқиш ва кейин ёқимсиз ҳид чиқараётган нарсаларни ювиш ёки чиқариб ташлаш бўлади.
Оёқ кийимлар ҳидини истеъмол содаси билан бартараф этинг
Агар ёқимсиз ҳиднинг манбаи пойабзал бўлса, уларга истеъмол содаси солинган қопчаларни қўйиш керак. Бир неча соат ўтгач, нохуш ҳид бутунлай йўқ бўлади.
Нам тозалашни амалга оширинг
Ҳиднинг манбаи шкафнинг бурчакларида тўпланган чанг бўлиши мумкин. Барча кийимларни чиқариб, шкафни нам латта билан яхшилаб артиб олиш тавсия этилади.
Хушбўй илгичлар
Ёғоч илгичлар ҳам ёмон ҳиднинг манбаи бўлиши мумкин. Уларга спрей ёки атир сепиш ҳиддан халос бўлишнинг ажойиб усулидир.
Хушбўй ҳид таратувчи пакетлар жойлаштиринг
Пакетлар ичида ёқимли ҳид таратувчи гиёҳлар мавжуд. Асосий бўлим ва шкафнинг тортмасига уларнинг бир нечтасини жойлаштириш натижасида ёқимсиз ҳидни гуллар ифори билан алмаштириш мумкин.
Эфир мойларидан фойдаланинг
Агар бундай пакетларни сотиб олишни ёқтирмасангиз севимли эфир мойларидан фойдаланиш мумкин. Бунинг учун шкаф бурчаклари ва тортмаларига бир неча томчи эфир мойи томизиш кифоя қилади.
Фаоллаштирилган кўмир
Агар юқоридаги усуллар муаммони ҳал қилмаса, барча кийимларни шкафдан олиб ташлаб, ҳар бир бўлимга бир нечта фаол кўмир таблеткаларини қўйиш керак. Сўнгра шкаф маҳкам ёпилиб, бир неча кун кутилади. Кўмир табиий чангни ютиш воситаси бўлиб, у барча ҳидларни тўлиқ ўзлаштиради.
Изоҳ (0)