Eron oliy yetakchisining jiyani namoyishlarni qo‘llab-quvvatlagach, hibsga olindi — OAV

Eron oliy yetakchisi oyatulloh Ali Homanaiyning jiyani Faride Moradxaniy dunyo jamoatchiligini mamlakat hukumati bilan barcha aloqalarni uzib tashlashga chaqirganidan keyin hibsga olindi. Bu haqda CNN va Reuters xabar bermoqda.

Uning akasi Mahmud Moradxaniy Twitter’da ma’lum qilishicha, Faride 23-noyabr kuni prokuraturaga murojaat qilganida sud qarori bilan hibsga olingan.

Faride akasi tomonidan e’lon qilingan videomurojaatida dunyo hamjamiyatini Eronni qamrab olgan namoyishlar fonida mamlakat rejimi bilan aloqalarni uzib, “Tehron bilan har qanday bitimlarni bekor qilishga” chaqirgandi.

Uning so‘zlariga ko‘ra, eronliklar mamlakat hukumatini qo‘llab-quvvatlaydiganlar bilan urush holatidadir. Shuningdek, u demokratik mamlakatlardan o‘z vakillarini Erondan chaqirib olib, Eron vakillarini esa mamlakatlaridan chiqarib yuborishni so‘ragandi.

Faride va Mahmud Moradxaniy — ruhoniy va muxolifatchi Ali Tehroniyning farzandlari bo‘lib, u oliy yetakchining singlisi Badri Husayniy Homanaiy bilan turmush qurgandi. Tehroniy oktabrda vafot etdi.

Erondagi namoyishlarga nima sabab bo‘ldi?

Eronda namoyishlar sentabr o‘rtalarida, 22 yoshli Mahsa Aminiyning o‘limidan keyin boshlandi. Politsiya uni Tehronda metrodan chiqish chog‘ida hijobni noto‘g‘ri o‘ragani uchun hibsga olgan.

Keyinroq Aminiyning akasi ma’lum qilishicha, politsiyachilar u bilan “qayta tarbiyalash” ishlarini o‘tkazishga va’da bergan. Politsiya uchastkasidan qiz tez yordam mashinasida olib ketilgan. Shifokorlar qizda yurak xuruji va insult yuz berganini bildirgan, u bir necha kundan keyin vafot etgan. Eron politsiyasi baxtsiz hodisa yuz berganini da’vo qilmoqda.

Eron hukumati fikricha, noroziliklar “islom rejimini zaiflashtirish bo‘yicha dushman strategiyasi”ning bir qismidir, mamlakat armiyasi esa namoyishlar fonida “dushmanlarga qarshi kurashish” va xavfsizlikni ta’minlash niyatida.

Eron oliy yetakchisi Ali Xomanaiy namoyishlar “oddiy eronliklar” tomonidan o‘tkazilmayotganini, balki oldindan rejalashtirilganini aytgandi, shuningdek, u AQSH va Isroilni tartibsizliklarni tashkillashtirishda ayblagandi.