Дунё аҳолисининг 90 фоизида коронавирусга қарши иммунитет бор — ЖССТ

Жаҳон соғлиқни сақлаш ташкилоти раҳбари Тедрос Гебрейесус маълум қилишича, дунё аҳолисининг камида 90 фоизида COVID-19 га нисбатан иммунитет ҳосил бўлган. Унинг сўзларига кўра, бу одамларнинг вакцина олгани ёки коронавирусни аввалроқ бошдан кечиргани натижасида юз берган.

«Пандемиянинг фавқулодда босқичи тугади, дейишга тобора яқинлашяпмиз. Аммо ҳали якунга етиб келмадик», — деди ЖССТ раҳбари.

Ташкилот бош директори сўзларига кўра, 21—27 ноябрь оралиғидаги даврда COVID-19 дан 8,5 мингдан зиёд киши вафот этган.

«Пандемия бошланганидан кейин уч йил ўтиб, қўл остимизда инфекциянинг олдини олиш ва ҳаётларни қутқариш учун шунча кўп воситалар турганида, бу қабул қилиб бўлмайдиган ҳолатдир», — деди Тедрос Гебрейесус.

Шу билан бирга, унинг таъкидлашича, коронавирусдан ўлим ҳолатларининг ҳафталик кўрсаткичи сўнгги беш ҳафта ичида бироз пасайган.

ЖССТ раҳбари, шунингдек, аниқлик киритишича, бугунги кунда «омикрон» штаммининг 500 дан ортиқ вариантлари мавжуд.

«‘Омикрон’ штамми пайдо бўлганидан бери COVID-19 мутацияга учрашда даавом этди. Бугунги кунда унинг 500 дан зиёд турлари айланиб юрибди. Уларнинг барчаси жуда юқумли, — деди Гебрейесус. — Эпидемиологик назорат, тестдан ўтказиш ва вакцинациядаги камчиликлар янги, хавотир уйғотувчи ва ўлим даражаси анча юқори бўлган вариант юзага келиши учун мукаммал шароитлар яратишда давом этмоқда».