Хитой ва Россия қирувчи самолётлари Жанубий Кореянинг ҳаво мудофаа зонасига кирди. Корея бунга жавобан ўз қирувчиларини ҳавога кўтарди. Бу ҳақда Sky News хабар берди.
Маълум қилинишича, Хитойнинг иккита Ҳ-6 бомбардимончи самолёти маҳаллий вақт билан тахминан 05:50 да Жанубий Корея ҳаво мудофаасини аниқлаш зонасига кириб, чиқиб кетган. Бир неча соат ўтгач, Хитой самолётлари Россиянинг Ту-95 бомбардимончи ва Су-35 қирувчи самолётлари билан бирга яна мудофаа зонасига қайтган. Улар Жанубий Корея ҳаво ҳудудини бузмаган.
Хитой бомбардимончи самолётлари Шарқий Хитой денгизидан Япон денгизига парвоз қилганда Япония ҳам ўз самолётларини кўтарган.
Эслатиб ўтамиз, ҳаво ҳужумидан мудофаа зонаси — бу махсус чоралар кўришни талаб қиладиган макон. Бу ҳудуд халқаро қоидалар билан тартибга солинмайди. Москва Жанубий Кореянинг ҳаво ҳужумидан мудофаа зонасини тан олмайди, Пекин эса бу мамлакат ҳаво ҳудуди эмаслигини, ҳаракат эркинлиги бўлиши кераклигини таъкидлайди.
Изоҳ (0)