Қозоғистон Ташқи ишлар вазири ўринбосари Роман Василенко ҳукуматнинг Россияга санкцияларни четлаб ўтишда ёрдам бериш борасидаги позициясини билдирди. Бу ҳақда «Нур.кз» хабар берди.
«Қозоғистон ўз ҳудудидан санкцияларни четлаб ўтиш учун фойдаланишга йўл қўймайди», — дейди сиёсатчи ва бу «ҳукуматнинг принципиал позицияси» эканини қайд этди.
Шунингдек, у Россия ва Украина ўртасидаги можаронинг дастлабки кунлариданоқ мамлакатда ҳукумат қошида комиссия тузилганини эслатди. Унинг вазифаси Қозоғистон иқтисодиётига салбий таъсирни ва Россияга санкцияларни четлаб ўтишда ёрдам беришнинг олдини олишдан иборат.
«Шунинг учун бу позициялар ўзгармайди, улар, албатта, ҳар қандай янги ташаббусларни баҳолашда қўлланилади», — дея хулоса қилди Роман Василенко.
Маълумот ўрнида, 28 ноябрь куни Европа Иттифоқи Кенгаши санкцияларни четлаб ўтиш ва уларга амал қилмасликни Европа Иттифоқидаги жиноий ҳуқуқбузарликлар рўйхатига киритди. Ҳозирги вақтда жиноятлар рўйхатига терроризм, одам савдоси, аёллар ва болаларнинг жинсий эксплуатацияси, наркотик ва қурол савдоси, коррупция, кибержиноятчилик ва уюшган жиноятчилик киради.
Изоҳ (0)