Эрон адлия органлари тўрт кишини Исроилнинг Моссад жосуслик агентлиги билан ҳамкорлик қилганликда айблаб, ўлимга ҳукм қилди. Бу ҳақда тҳе Times of Israel хабар берди.
Маълум қилинишича, айбланувчилар одам ўғирлашда ҳам иштирок этгани даъво қилинмоқда.
«Бу гуруҳ Исроил разведка хизмати кўрсатмаси билан шахсий ва жамоат мулкини ўғирлаб, йўқ қилган. Одамларни ўғирлаган ва қалбаки иқрорномалар олган», дейилади айбловда.
Таъкидланишича, айбланувчилар Эрон Ислом инқилоби қўриқчилари корпуси ва Разведка вазирлиги томонидан ҳибсга олинган. Бундан ташқари, яна уч киши миллий хавфсизликка қарши ҳаракат қилиш, одам ўғирлашга ёрдам бериш ва ноқонуний қурол сақлаш каби жиноятларни содир этганликда айбланиб, 5 йилдан 10 йилгача муддатга озодликдан маҳрум этилган.
Эслатиб ўтамиз, Эронда 22 ёшли Маҳса Аминийнинг ўлимидан кейин намойишлар бошланганди. Полиция уни Теҳронда метродан чиқиш чоғида ҳижобни нотўғри ўрагани учун ҳибсга олган. Кейинроқ Аминийнинг акаси маълум қилишича, полициячилар у билан «қайта тарбиялаш» ишларини ўтказишга ваъда берган. Полиция участкасидан қиз тез ёрдам машинасида олиб кетилган. Шифокорлар қизда юрак хуружи ва инсульт юз берганини билдирган, у бир неча кундан кейин вафот этган. Эрон полицияси бахтсиз ҳодиса юз берганини даъво қилмоқда.
Эрон ҳукумати фикрича, норозиликлар «ислом режимини заифлаштириш бўйича душман стратегияси»нинг бир қисмидир, мамлакат армияси эса намойишлар фонида «душманларга қарши курашиш» ва хавфсизликни таъминлаш ниятида.
Эрон олий етакчиси Али Хоманаий намойишлар «оддий эронликлар» томонидан ўтказилмаётганини, балки олдиндан режалаштирилганини айтганди, шунингдек, у АҚШ ва Исроилни тартибсизликларни ташкиллаштиришда айблаган.
Ўз навбатида, Эрон ҳукумати тартибсизликларга алоқадор олти кишини ўлимга ҳукм қилган.
Изоҳ (0)