Eron adliya organlari to‘rt kishini Isroilning Mossad josuslik agentligi bilan hamkorlik qilganlikda ayblab, o‘limga hukm qildi. Bu haqda the Times of Israel xabar berdi.
Ma’lum qilinishicha, ayblanuvchilar odam o‘g‘irlashda ham ishtirok etgani da’vo qilinmoqda.
“Bu guruh Isroil razvedka xizmati ko‘rsatmasi bilan shaxsiy va jamoat mulkini o‘g‘irlab, yo‘q qilgan. Odamlarni o‘g‘irlagan va qalbaki iqrornomalar olgan”, deyiladi ayblovda.
Ta’kidlanishicha, ayblanuvchilar Eron Islom inqilobi qo‘riqchilari korpusi va Razvedka vazirligi tomonidan hibsga olingan. Bundan tashqari, yana uch kishi milliy xavfsizlikka qarshi harakat qilish, odam o‘g‘irlashga yordam berish va noqonuniy qurol saqlash kabi jinoyatlarni sodir etganlikda ayblanib, 5 yildan 10 yilgacha muddatga ozodlikdan mahrum etilgan.
Eslatib o‘tamiz, Eronda 22 yoshli Mahsa Aminiyning o‘limidan keyin namoyishlar boshlangandi. Politsiya uni Tehronda metrodan chiqish chog‘ida hijobni noto‘g‘ri o‘ragani uchun hibsga olgan. Keyinroq Aminiyning akasi ma’lum qilishicha, politsiyachilar u bilan “qayta tarbiyalash” ishlarini o‘tkazishga va’da bergan. Politsiya uchastkasidan qiz tez yordam mashinasida olib ketilgan. Shifokorlar qizda yurak xuruji va insult yuz berganini bildirgan, u bir necha kundan keyin vafot etgan. Eron politsiyasi baxtsiz hodisa yuz berganini da’vo qilmoqda.
Eron hukumati fikricha, noroziliklar “islom rejimini zaiflashtirish bo‘yicha dushman strategiyasi”ning bir qismidir, mamlakat armiyasi esa namoyishlar fonida “dushmanlarga qarshi kurashish” va xavfsizlikni ta’minlash niyatida.
Eron oliy yetakchisi Ali Xomanaiy namoyishlar “oddiy eronliklar” tomonidan o‘tkazilmayotganini, balki oldindan rejalashtirilganini aytgandi, shuningdek, u AQSH va Isroilni tartibsizliklarni tashkillashtirishda ayblagan.
O‘z navbatida, Eron hukumati tartibsizliklarga aloqador olti kishini o‘limga hukm qilgan.
Izoh (0)