Ҳиндистонда миллиардер Гаутам Аданининг янги лойиҳасига қарши оммавий намойишлар авж олди

Ҳиндистон жанубидаги Керала штатида намойишчилар билан бўлиб ўтган тўқнашувда камида 36 нафар полициячи жароҳатланди, деб хабар бермоқда Reuters.

Вижинжама туманида Адани Group компанияси томонидан порт қурилишига қарши чиққан фуқаролар полиция томонидан ҳибсга олина бошлагач, зиддият юзага келди. Қарийб 900 миллион долларлик порт лойиҳаси Ҳиндистон ҳукумати томонидан 2015 йилдаёқ маъқулланган. Бироқ миллиардер Гаутам Аданининг компанияси ҳалигача қурилишга кириша олгани йўқ.

Компания дастлаб ерни сотиб олиш масалаларини ҳал қилди, сўнг қурилиш COVID-19 пандемияси туфайли кечиктирилди. Компания лойиҳани амалга оширишга жорий йилда киришишга умид қилганди, бироқ августдан буён қурилиш майдонини маҳаллий аҳоли, асосан балиқчилар жамияти вакиллари тўсиб қўймоқда. Улар Вижинжамада йирик порт қурилиши натижасида қирғоқ жинслари эрозияси кучайиб, балиқчилар тирикчилик воситаларидан айрилади, деб ҳисобламоқда.

Суд порт қурилиши қонуний экани ҳақида қарор чиқарди, шундан кейин ўтган дам олиш кунлари техника яна бир бор объектга киришга уриниб кўрди. Намойишчилар яна йўлни тўсиб қўйди, сўнг воқеа жойига полиция отрядлари етиб келиб, оммавий ҳибсга олинишлар бошланди.

Бундан норози бўлган юзлаб намойишчилар полиция участкасига бориб, ўз маслакдошларининг озод этилишини талаб қилди. Полиция маълум қилишича, намойишчилар «қурол билан келиб, участкага бостириб кирган ва полициячиларни гаровга олиб, қўлга олинганлар озод этилмаса, участкага ўт қўйиш билан таҳдид қилган».

Адани Group воқеа юзасидан изоҳ берганича йўқ.

Осиёнинг энг бой одами

Шу йил февралида кичик бизнес тижоратини кўп тармоқли портлар, шахталар ва «яшил» энергия бизнесига айлантирган ҳиндистонлик миллиардер Гаутам Адани Осиёнинг энг бой одамига айланган эди.

Сентябрда эса у Жефф Безосни ортда қолдириб, дунёнинг иккинчи энг бой одамига айланди. Йилни Bloomberg миллиардерлар индексида 14-ўриндан бошлаган Аданининг бойлиги 146,9 миллиард долларга етди, бу Илон Маскнинг 260 миллиард долларидан кейинги энг кўп бойлик.

60 ёшли Адани 1980 йилларнинг бошида Мумбайнинг олмос саноатида омадини синаб кўриш учун коллежни ташлаб кетган.

Ўшандан бери унинг конгломерати аэропортлардан тортиб маълумот марказлари, цемент, оммавий ахборот воситалари ва яшил энергиягача кенгайиб, бош вазир Нарендра Моди Ҳиндистоннинг узоқ муддатли иқтисодий мақсадларига эришиш учун муҳим деб ҳисоблаган соҳаларга эътибор қаратди.

Мамлакатдаги энг йирик хусусий сектор порти ва аэропорт операторлари, шаҳар-газ дистрибюторлари ва кўмир ишлаб чиқарувчиси Адани империясининг бир қисми бўлиб, у ҳам дунёдаги энг йирик қайта тикланадиган энергия ишлаб чиқарувчиси бўлишни мақсад қилган.