Boeing компанияси Пентагонга Украина учун базаси ер устида бўлган юқори аниқликдаги кичик габаритли арзон бомбалар (GLSДБ) ишлаб чиқаришни таклиф қилди. Бу ҳақда Reuters тегишли махфий ҳужжатларга таяниб хабар берди.
GLSДБ снаряди М26 ракета двигатели ва ГБУ-39 кичик диаметрли бомбасидан иборат. Ўқ-дорининг нархи бор-йўғи 40 минг долларга тенг, М26 двигатели эса кенг тарқалган, натижада снарядни ишлаб чиқариш арзон ва осон бўлади.
GLSДБ парвоз масофаси тахминан 150 километрга тенг — Reuters қайд этишича, бу Украинага Россиянинг фронтдан анча ичкари ҳудудларидаги нишонларга зарба бериш учун шароит яратади, аввал бу имконсиз деб ҳисобланилган эди.
Бундай бомбаларнинг дастлабкилари Украинага 2023 йил баҳоридаёқ етказиб берилиши мумкин. Reuters’нинг қурол-яроғ соҳасидаги манбаларига кўра, GLSДБ Украина учун янги қурол ишлаб чиқариш бўйича бир нечта вариантлардан атиги биттаси, холос.
Украинада жанговар ҳаракатлар чўзилиб боргани сари, у Ғарбдан тобора кўпроқ қурол-яроғ сўрамоқда. Шу билан бирга, АҚШ сўнгги вақтларда ўз захирасидаги қуроллар Украинага берилаётган ёрдам туфайли, хавфли даражагача камайиб кетаётгани юзасидан хавотирлар билдирмоқда.
Аввалроқ ҳарбий ёрдамнинг катта қисми Украинага йўналтирилгани учун, АҚШ ҳукумати Тайванни барча зарур қурол-яроғ билан таъминлай олмаслигидан хавотирланаётгани хабар берилган эди.
Изоҳ (0)