Жазоирнинг Дар-ал-Байда туманида суд бир эркакни оломон қилиб ўлдирган ва унинг жасадини таҳқирлаган 49 кишини ўлим жазосига ҳукм қилди. Марҳум шахс ўтган йилнинг августида ўрмон ёнғинлари чоғида ўт қўйишда хатолик билан айбланган.
Ал Арабия портал маълумотларига кўра, оммавий қатлда иштирок этган яна 20 киши турли муддатларга қамалган.
Августда Жазоир полицияси ўрмонларга ўт қўйишда қатнашганликда айбланган эркакни судсиз-сўроқсиз оломон қилишда гумонлаб бир неча ўнлаб кишилар қўлга олинганини маълум қилганди.
Жазоир бош прокуратураси маълумотларига кўра, 11 август куни Ларбаа-Нат-Иратен шаҳрида бир гуруҳ шахслар уч эркакни қўлга олиб, уларни ўрмонларга ўт қўйишда гумон қилган ва дўппослай бошлаган. Вазиятга полициячилар аралашиб, уч эркакни участкага олиб кетган, бироқ оломон улардан бирини полиция бўлимидан чиқариб олишга муваффақ бўлган.
38 ёшли Жамол бин Исмоил шаҳар майдонида дўппосланган, сўнг бошидан бензин қуйиб, ёқиб юборилган. Қурбонни қутқаришга уринган полиция ходимлари ҳам жабрланган. Кейинроқ маълум бўлишича, у айбсиз бўлган, шунчаки одамларга ёнғинни ўчиришда ёрдам беришга келган.
Жазоир шимоли-ғарбидаги Тизи-Узу тумани ўрмонларида ёнғинлар 2021 йил августида юз бериб, камида 90 кишининг ҳаётига зомин бўлганди.
Изоҳ (0)