«Бу — енгилганларнинг қасоси». Зеленский Херсоннинг Россия томонидан ўққа тутилиши ҳақида

Украина президенти Владимир Зеленский кечки мурожаатида айтишича, Херсон шаҳри ҳамда Херсон вилоятидаги Россия ҳарбийлари тарк этган бошқа аҳоли пунктларининг ўққа тутилиши — «енгилганларнинг қасоси»дир.

«Улар жанг қилишга қодир эмас. Улар ҳозирча қодир бўлган ягона нарса — террор қилиш (қўрқитиб ўз ҳукмини ўтказиш). Энергетика террори ёки артиллерия террори, ёки ракета террори — мана Россия ҳозирги раҳбарлари даврида қандай даражагача таназзулга юз тутди», — деди Зеленский.

Украина президенти кечки мурожаатида Россиянинг ракета зарбаларидан кейин авария хизматлари ва бошқа тузилмалар электр таъминотини иложи борича тезроқ қайта тиклаш учун олиб бораётган саъй-ҳаракатларга алоҳида урғу берди. Бундан ташқари, Зеленский Украинани қўллаб-қувватлаётган иттифоқчилар билан музокаралар ҳақида гапириб берди.

Россия қўмондонлиги ноябрь бошида Днепрнинг ўнг қирғоғида ўзлари эгаллаб олган ҳудудлардан, шу жумладан, Херсондан чекинаётганини эълон қилганди. 11 ноябрь куни Херсон озод этилди. Шундан кейин шаҳар Россия қўшинлари томонидан ўққа тутилаётгани ҳақида ҳар куни хабар берилиб келмоқда.