Унинг қисмати шунчаки мода оламидаги фожиа эмас. Бу самимийликка ўрин йўқ дунёда ўзлигини сақлаб қолишга интилган ёш қиз ҳақидаги ҳикоядир.
Ким Да Ул 1989 йил 31 майда Сеулда таваллуд топган. Болалигиданоқ санъатга қизиқиб, ўсмирлик пайтидаёқ моделлик фаолиятини бошлаган. Илк бор камера қаршисига чиққанида атиги 13 ёшда эди. Жанубий Кореяда тез орада шуҳрат қозониб, маҳаллий Vogue ва Harperъс Bazaar журналлари муқоваларига суратга тушади ҳамда 2007 йилда Париж мода ҳафталигида дебют қилади.
Карьерадаги муваффақият
Халқаро майдонда Ким Да Ул ёки ўз расмлари ва блогида имзо қўйгани каби шунчаки Ким - тез орада машҳур бўлди. Унинг беғубор чеҳраси Британиянинг Vogue, и-Д, Dazed ва Cонфусед журналлари саҳифаларини безаб турарди.
Карл Лагерфелд, Вивен Вествуд ва Александр Маккуин каби буюк моделерлар осиёлик гўзалларга эътибор қаратган пайт эди.
У идеал кўринарди: баланд бўйли, замонавий, дадил феъл-атворли. 2008 йилда Анан журнали уни йилнинг энг яхши модели деб эътироф этди. Ким Ҳ&М, ГAP, Topshop ва Chanel учун рекламаларда суратга тушган. Моделлик фаолияти билан бир вақтда у “I Лике то Форк Мйселф” номли блог юритарди ва расм чизарди — у овоз чиқариб айтолмаган фикрларини суратларда ифодаларди.
Саҳна ортидаги портрет
Ким рассомчиликка қизиқар, кўргазмалар уюштирар, Клаус Кинский фильмларини севиб томоша қилар, қадимий санчқиларни тўплар ва ҳатто танасига юлдуз шаклидаги татуировка ҳам қилдирган эди. Ташқи кўринишидан замонавий услуб тимсолига айланган бу қиз ички дунёси ташвишли, нозик, ёшига нисбатан анча улғайган, ёлғизлик ва руҳий толиқишни бошдан кечираётган қизалоқ эди.
У ўз кечинмаларини блогида баҳам кўрарди. Унда депрессия, ўзига зарар етказиш, ҳолдан тойиш ва оғриқ ҳақидаги ёзувлар бор эди. 2007 йилдаёқ у шундай деб ёзганди: “Юзимни парчалаб ташлайман... Да Ул сифатидаги ҳаётим жуда бахтсиз ва ёлғиз. Илтимос, бошқа оламдаги ёлғизлигимни мен билан баҳам кўринг”.
Кейин қўшиб қўярди: “Ҳазиллашяпман. Ҳаммаси жойида. Шунчаки чарчаганман”. 2009 йил октябрь ойида, Нью Йорк мода ҳафталиги пайтида, у: “Жуда тушкунликка тушганман ва ҳолдан тойганман”, деб ёзган эди.
Сўнгги пост
2009 йилнинг кузида Ким Парижга кўчиб ўтади — бу унинг карьерасидаги янги босқич эди. Бироқ янги ютуқлар ўрнига фожиали якун юз беради. 2009 йил 19 ноябрда уни Париждаги квартирасидан ўлик ҳолда топишади. Ўлим сабаби — ўз жонига қасд қилиш. Ўшанда Ким атиги 20 ёшда эди.
Унинг блогидаги сўнгги ёзув Жим Риверснинг “I Го Deep” қўшиғи бўлиб, у “Сай Ҳи то Forever” сарлавҳаси остида эълон қилинган.
Ким ўша йили вафот этган тўққизинчи жанубий кореялик машҳур шахс бўлди. Унинг ўлими мода оламини ларзага солди — кўпчилик учун у шунчаки модел эмасди. У саноат ҳақида гапиришни ёқтирмайдиган ҳақиқат тимсоли эди: босим, ёлғизлик ва ўз-ўзидан қўрқиш каби муаммоларнинг рамзи бўлди.
Ўлимидан сўнг
Йиллар ўтгач, Ким услуб ва ички кураш рамзи сифатида хотирланди. Унинг ўлими нафақат ярқироқ ва мукаммал ташқи қиёфага, балки унинг ортидаги ҳақиқатга ҳам эътибор қаратиш нақадар муҳимлигини эслатади. У ўзини на рассом, на инсон сифатида тўлиқ намоён этишга улгурмади. Бироқ унинг самимияти ва нозиклиги мода тарихининг ажралмас қисмига айланди.
У атиги 20 йил умр кўрди. Аммо шу қисқа вақт ичида ҳам дунёга кўпчиликдан кўра кўпроқ нарса айтишга улгурди.
Изоҳ (0)