Ўзбекистон қонунчилигида 2025 йил 1 июлдан бир қатор ўзгариш ва янгиликлар кучга кирди. Қуйида ушбу санадан кучга кирган асосий ўзгаришлар тақдим этилди.
Пенсия ва нафақалар миқдори 10 фоизга ошди
Бунда:
- ёшга доир энг кам пенсия миқдори — ойига 918 000 сўм;
- ногиронлик пенсияларининг энг кам миқдори — ойига 1 012 000 сўм;
- кам таъминланган оилаларга болалар нафақасининг ҳар ойлик миқдори:
- 3 ёшгача бўлган битта кичик фарзанди учун — 360 000 сўм, 3 ёшдан 18 ёшгача бўлган битта фарзанди учун — 275 000 сўм;
- оиланинг иккинчи фарзанди учун қўшимча — 165 000 сўм;
- оиланинг учинчи ва ундан кейинги ҳар бир фарзанди учун қўшимча — 110 000 сўм;
- кам таъминланган оилалар учун моддий ёрдамнинг ойлик миқдори – 420 000 сўм бўлди.
Айрим шифокорларга устамалар тўланади
республиканинг барча давлат тиббиёт муассасаларида махсус кўникмаларни талаб қиладиган даволаш чораларини кўрган ҳамда юқори хавф даражасига эга бўлган амалиётларни самарали амалга оширган шифокорларнинг ойлик маошларига 25 фоиздан 100 фоизгача устама тўланади.
Соғлиқни сақлаш тизимини ташкил этишнинг янги модели жорий этилди
Республиканинг 15 та туман (шаҳар)ларида, тажриба-синов тариқасида соғлиқни сақлаш тизимини ташкил этишнинг янги модели жорий этилади. Бунда қуйидаги мақсадлар белгиланди, жумладан:
- оилавий поликлиникаларда кўрсатиладиган тиббий хизматлар сифат ва самарадорлигини ошириш;
- тиббиёт ходимларининг билим ва малакасини ошириш, улар меҳнатига муносиб ҳақ тўлаш тизимини жорий қилиш;
- аҳолига тиббий хизмат кўрсатишда қисқа муддатли чора-тадбирларни ўз ичига олган “Тиббиётда 90 кунлик ўзгаришлар” дастурини амалга ошириш.
Уй-жой сотиб олишда “эскроу” тизими жорий этилди
Бу қурувчи ва харидор ўртасидаги олди-сотдининг янгича шакли. Эндиликда, ҳали битмаган уйдан квартира сотиб олмоқчи бўлган фуқаро, ўша уйга ўз маблағларини тикиш орқали улушдорга айланади. Бунинг учун қурувчи, яъни девелопернинг ўзига эмас, банкка тўлов қилади. Улушдорнинг тўлаган пуллари алоҳида “эскроу” ҳисобварағида йиғилиб борилади. Уй битмагунча қурувчи компания бу пуллардан фойдалана олмайди. Турар жойни эса ўз маблағлари ёки банк кредити асосида қуриб битказади.
1 июлдан кучга кирган тартиб жорий йил охиригача ихтиёрий бўлади. 2026 йил 1 январдан эса қурилишда маблағларини жалб қилиш фақат эскроу ҳисобварағи орқали амалга оширилади.
Энергия самарадорлигини ошириш рағбатлантирилади
Аҳоли уй-жойларининг энергия аудитини ўтказиш харажатлари ҳамда қуёш панеллари ва гелиоколлекторлар қийматининг 20 фоизи ва иссиқлик насослари қийматининг 40 фоизини қоплаш учун Энергия самарадорлиги миллий агентлиги томонидан субсидия ажратилади. Бироқ ушбу миқдорлар БҲМнинг 50 бараваридан ошмаган қийматда қопланади.
Айрим шахсларга ҚҚС бир иш кунида қайтарилади
“Ижтимоий ҳимоя ягона реестри” ҳамда “Камбағал оилалар реестри”га киритилган шахсларга белгиланган товарлар (хизматлар)ни харид қилишда тўланган ҚҚС суммаси 1 иш кунида қайтарилади.
Биринчи марта ҳуқуқбузарлик содир этган тадбиркор жавобгарликдан озод этилади
2028 йил 1 январгача “Биринчи имконият” тамойили жорий этилди. Бунда биринчи фаолият йили давомида савдо ва тадбиркорлик соҳаларига оид маъмурий ҳуқуқбузарликни илк бор содир этган кичик тадбиркорлик субъектлари маъмурий жавобгарликдан озод этилади.
Тадбиркорларга янги мажбуриятлар юклайдиган нормаларни қабул қилишга мораторий кучга кирди
2028 йил 1 январгача кичик ва ўрта бизнес субъектлари зиммасига янги мажбуриятлар юклатадиган норматив-ҳуқуқий ҳужжатларни қабул қилишга мораторий эълон қилинди.
Шунингдек, тадбиркорларга янги тартибга солиш воситаларини белгиловчи ёки амалдагиларини кучайтирувчи норматив-ҳуқуқий ҳужжатларга нисбатан “ягона санадан янги қоидалар” тамойили қўлланади ва ушбу нормаларнинг кучга кириш санаси 1 январь ёки 1 июль этиб белгиланади.
Айрим экофаол фуқароларга субсидия берилади
“Экофаол фуқаро” платформасига ўзи эккан дарахти тўғрисида маълумотлар киритган камбағал оилалар аъзоларига ўрмон фонди ерларида экилган ҳар 100 та дарахт учун БҲМнинг 1 баравари миқдорида субсидия ажратилади.
Бунда субсидия йил давомида 2 га бўлиб (кўчатлар экилган вақтда ҳамда уларни парваришлаш давридан кейин) тенг улушларда тўланади.
Янги ташкил этиладиган таълим ташкилотлари фаолияти икки босқичда йўлга қўйилади
1-босқичда фаолиятни бошлаш учун ўрта махсус, касбий, олий ва олий таълимдан кейинги таълим ташкилотлари ўрнатилган тартибда лисензияланади, кадрларни қайта тайёрлаш ва уларнинг малакасини ошириш таълим ташкилотлари хабардор қилиш тартибида ташкил этилади;
2-босқичда таълим ташкилотларининг кадрлар тайёрлаш йўлга қўйиладиган таълим дастурлари махсус давлат аккредитациясидан ўтказилади.
Бунда махсус давлат аккредитациясидан ўтмасдан қабул жараёнини амалга ошириш лисензия талаб ва шартларини қўпол равишда бузиш деб баҳоланади ва таълим ташкилотига берилган лисензиянинг бекор қилинишига асос бўлади.
Малака оширишнинг янги шакли жорий этилди
Давлат сиёсати ва бошқаруви академияси давлат органлари ва ташкилотлари томонидан давлат хизматчилари малакасини ошириш ва қайта тайёрлаш ходимларнинг касбий ривожланиш эҳтиёжларига асосланган ҳолда ташкил этилади. Шунингдек, малака оширишнинг анъанавий, муқобил ва мустақил шакллари жорий этилди.
Болалар учун контент яратган шахсларга солиқ имтиёзи берилади
2030 йил 1 январгача юридик шахслар, шунингдек, Болалар контентини ривожлантириш марказининг болалар учун контентлар яратишдан олган даромади жами йиллик даромадининг камида 80 фоизини ташкил этганда уларга қуйидаги имтиёзлар берилди:
- фойда солиғи тўлашдан озод қилинади;
- ижтимоий солиқни 1 фоиз миқдорида тўлайди.
Ногиронлик пенсиялари проактив шаклда тайинланади
Давлат пенсиялари ва компенсацияларни тайинлашнинг соддалаштирилган тартиби жорий этилди. Бунда фуқароларга I ёки II гуруҳ ногиронлиги белгиланганда пенсиялар алоҳида мурожаат талаб этмасдан проактив шаклда тайинланади.
Шунингдек, фуқарога проактив шаклда тайинланган пенсияларни рад қилиш ҳуқуқи берилди.
Жонли ижро ҳафталиги ўтказилади
Жонли ижрода ташкил этиладиган концерт-томоша тадбирлари бўйича рекламаларни Ўзбекистон МТРК тизимидаги телерадиоканалларда эфирга бериш учун тадбир ташкилотчисига 30 фоиз миқдорида чегирма берилади.
Шунингдек, ҳар чоракда республиканинг барча ҳудудларида Жонли ижро ҳафталиги ўтказилади.
Изоҳ (0)