Украина президенти Владимир Зеленский Бирлашган Миллатлар Ташкилоти Хавфсизлик кенгашининг шошилинч чақирилган навбатдан ташқари йиғилишида Россиянинг энергетика террорини тўхтатишга чақирди ва БМТ экспертларини Украинанинг муҳим инфратузилма объектларини келиб текширишга таклиф қилди. 23 ноябрь куни Украина электр таъминотида катта узилишлар юз бериб, аҳолининг аксарияти электрсиз қолган.
«Украина номидан БМТ экспертларини муҳим инфратузилма объектларига ташриф буюришга таклиф қиламан. Уларнинг ҳолатини баҳолаш керак», — деди Зеленский БМТ Хавфсизлик Кенгаши йиғилишидаги видеоалоқа орқали сўзлаган нутқида. Бундан ташқари, у Россияни БМТ Хавфсизлик кенгашида вето ҳуқуқидан маҳрум этишни таклиф қилди.
23 ноябрь куни Россия Киев ва Украинанинг қатор вилоятларига янги ракета зарбаларини берди. Украина Энергетика вазирлиги маълумотларига кўра, ўққа тутилишлар сабаб барча атом электр станциялари ҳамда Украинанинг аксарият иссиқлик электр станциялари ва гидроэлектр станциялари ўчирилган. Украина президенти офиси раҳбари Андрей Ермак мамлакатда электр таъминотидаги узилишлар бир неча ҳафта давом этиши мумкинлигини айтди. Унинг сўзларига кўра, шу сабабли Украина генераторларнинг стратегик захирасига муҳтож.
10 ва 11 октябрь кунлари ҳам Украина ҳудудига оммавий зарбалар берилган эди. Ўшанда мамлакатнинг бешта вилоятида қисман блекаут юз берган.
Аввалроқ Зеленский Украинага янги ракета ҳужумлари содир бўлган тақдирда фойдаланиш учун 4 мингдан ортиқ «бузилмас пунктлар» тайёрлаб қўйилганини айтганди. Улар уяли алоқа, интернет, электр ва иссиқлик таъминоти билан жиҳозланади.
Изоҳ (0)