Ангрен шаҳри ҳокими Алишер Раимовнинг тадбиркорни ҳақоратлагани эшитилган аудио тарқалганди. Тошкент вилояти ҳокимлиги унга ҳайфсан интизомий жазо чораси қўлланганини маълум қилди.
Тошкент вилояти ҳокимлиги Одоб-ахлоқ комиссиясининг 19 ноябрдаги йиғилишида давлат хизматчиси учун номақбул сўзлар, ҳақоратлар ишлатилган аудиоёзув тарқалгани кўриб чиқилиб, тегишли чора кўриш учун вилоят ҳокими Зоир Мирзаевга тақдимнома киритилган эди.
Тошкент вилояти ҳокими Зоир Мирзаевнинг 24 ноябрдаги фармойишига биноан Вазирлар Маҳкамасининг «Давлат фуқаролик хизматчилари томонидан одоб-ахлоқ қоидаларига риоя этилишини таъминлаш бўйича қўшимча чора-тадбирлари тўғрисида»ги қарори талабларига риоя қилмагани, давлат хизматчисининг касб этикасини бузгани, мансаб ваколатларини суиистеъмол қилиб, ноқонуний хатти-ҳаракатларни содир этгани учун Ангрен шаҳар ҳокими Алишер Раимовга нисбатан ҳайфсан интизомий жазо чораси қўлланган.
Изоҳ (0)