Суриядаги портлашда эронлик полковник Довуд Жафарий ҳалок бўлди. Бу ҳақда Эрон Ислом инқилоби посбонлари корпусига таяниб, IRNA расмий ахборот агентлиги хабар берди.
«Ислом инқилоби посбонлари корпусининг аэрокосмик кучлари юқори мартабали зобитларидан бири, Сурияда ҳарбий маслаҳатчи бўлиб ишлаган полковник Довуд Жафарий Дамашқ яқинидаги йўлда портлаш оқибатида шаҳид бўлди», — дейилади хабарда.
Эрон ҳарбийлари Сурияда иттифоқчи маҳаллий кучлар билан маслаҳатлашувлар ўтказаётган эди. Хабарга кўра, уларнинг машинасига портловчи моддалар ўрнатилган. Жафарий машинага ўтириши биланоқ бомба ишга тушган.
Эрон томони қотилликда «Исроил агентлари»ни айблади ҳамда «сохта ва жиноятчи сионистик режимдан, албатта, қасос олишини» таъкидлади.
Қуддус айбловларга жавоб бермади. Таъкидланишича, полковникнинг ўлимидан бир неча кун олдин Эроннинг камикадзе дронлари Уммон кўрфазидаги кемага ҳужум қилган. Кема билвосита Исроилга тегишли бўлган.
Ислом инқилоби посбонлари корпусининг дронлари ва ракета қўшинлари дастурига Довуд раҳбарлик қилар эди. Унинг ўзи 2016 йилда Форс кўрфазида америкалик денгизчиларни қўлга олиш операцияси иштирокчиси сифатида танилган. Полковник унвони унга ўша пайтда берилган.
Изоҳ (0)