Россия Туркияни Сурия ва Ироққа қилинган ҳужумлардан кейин вазминликка чақирди. Бу ҳақда Россия президентининг Сурия бўйича махсус вакили Александр Лаврентевга таяниб, «РИА Новости» хабар берди.
Сиёсатчининг сўзларига кўра, берилган авиазарбалар ортидан кескинликнинг кучайишига йўл қўйиб бўлмайди.
«Туркиялик ҳамкасбларимизни Суриянинг нафақат шимолий ва шимоли-шарқий ҳудудларида, балки бутун ҳудудда кескинлик кучайишига йўл қўймаслик учун вазминлик кўрсатишга чақирамиз», — деди Лаврентев.
У бу борада барча манфаатдор томонлар билан ишлаш давом эттирилиши ва «курд масаласи»ни тинч йўл билан ҳал қилишга ҳаракат қилиш кераклигини билдирди. Лаврентев Туркия Сурия ва Ироқдаги ҳаво операцияси ҳақида Россияни олдиндан хабардор қилмагани, бу масала Сурия бўйича Остонадаги учрашувда муҳокама қилинишини таъкидлади.
«Биз туркиялик ҳамкорларимизни Сурия ҳудудида ҳаддан ташқари куч ишлатмасликка ишонтиришга умид қиламиз», — деди Россия президентининг махсус вакили.
У Туркиянинг Сурия ва Ироққа зарбалари 13 ноябрь куни Истанбулда содир этилган теракт сабаб бўлганини айтди. Ҳужумда гумонланувчи қўлга олинди, у Туркияда тақиқланган Курдистон Ишчилар партияси билан алоқаси борлигини тан олди.
Мавзуга доир:
Изоҳ (0)