Польша Украина ракетаси мамлакат шарқида қулагани учун Россияга қарши уруш бошлашни хоҳламайди. Бу ҳақда Польша президенти Анжей Дудага таяниб, «РИА Новости» хабар берди.
«Ишонинг, мен жуда эҳтиёткорман. Ҳодисада русларни айбламайман. Менимча, урушда ҳар икки томон бир-бирини айблайди. Сизнингча, менга Россия билан уруш керакми? Йўқ. Россия билан урушни хоҳламайман ва жуда эҳтиёткорман», — деди Дуда.
У айнан шу сабабли НАТО низомининг жамоавий мудофаа тўғрисидаги бешинчи модда ҳақида гапирмагани, фақат асосий шартноманинг тўртинчи моддасини ишга тушириш ташаббуси билан чиққанини айтди.
Дуданинг сўзларига кўра, Украина президенти Владимир Зеленский содир бўлган воқеада Россияни айбламоқда.
«Зеленскийнинг айтишича, Польша ҳудудига қулаган ракета Россияга тегишли. Шу сабабдан у Украина ракетаси бўлиши мумкин эмаслигини айтди. Президент қўлида далиллар борлигини ҳам қўшимча қилди», — дейди Польша раҳбари.
Бундан ташқари, Дуда АҚШ президенти Жо Байден унга терговда иштирок этиш учун экспертларни юборишга ваъда берганини эслатиб ўтди. Польша раҳбари, шунингдек, «бомба»дан кўра, Украина атом электр станцияларига қилинган ҳужум туфайли ядровий фалокат юзага келиши эҳтимолидан кўпроқ хавотирда эканини таъкидлади.
Эслатиб ўтамиз, 15 ноябрь куни Польшанинг Украина билан чегарадош Пржеводов қишлоғига иккита ракета тушди, икки киши ҳалок бўлди. Воқеа сабабли Польша бош вазири Матеуш Моравески хавфсизлик ва мудофаа бўйича ҳукумат қўмитасининг шошилинч йиғилишини ўтказди. Ҳавога қирувчи самолётлар кўтарилди. Россия Хавфсизлик кенгаши раиси ўринбосари Дмитрий Медведев Польшада қулаган ракета билан боғлиқ воқеа Ғарб жаҳон уруши эҳтимолини ошираётганини исботлашини айтди.
Ўз навбатида, Туркия президенти Польшага тушган ракеталарнинг Россияга алоқаси йўқлигини айтди. НАТО бош котиби ҳам ракеталарнинг Украинага тегишли экани эҳтимоли юқорилигини билдирди. Аммо бунда Киев айбдор эмаслиги, Россия жавобгар эканини айтди. Польша президенти ҳам шундай фикрларни илгари сурди. Германия ва Британия эса Польшага ракета тушишига «Путин уруши» сабабчилигини таъкидлади.
Мавзуга доир:
Изоҳ (0)