Ўзбекистоннинг 4 та ҳудудида 7 млрд сўмдан ортиқ кредит маблағлари талон-торож қилинди

Хоразм, Қаҳқадарё, Наманган вилоятлари ва Қорақалпоғистон ҳудудида кредит маблағларини талон-торож қилиш ҳолатлари аниқланди. Бу ҳақда Иқтисодий жиноятларга қарши курашиш департаменти ахборот хизмати хабар берди.

Қайд этилишича, Бош прокуратура ҳузуридаги департамент органлари томонидан банкларнинг комплаенс-назорати тузилмалари билан ҳамкорлик доирасида пул маблағларининг талон-торож қилиниши бўйича аниқланган қонунбузилиш ҳолатлари юзасидан ўз вақтида қонуний чоралар кўрилмоқда.

Хусусан, департаментнинг Қорақалпоғистон бошқармаси томонидан ўтказилган терговга қадар текширувда «Б.С.» МЧЖ мансабдор шахслари ҳудудий тижорат банки филиалидан чорвачиликни ривожлантириш учун ажратилган кредит маблағларининг 3,3 млрд сўмини бошқа мақсадларда сарфлаб, талон-торож қилгани аниқланган.

Шу каби, департаментнинг Ҳазорасп тумани бўлими томонидан ҳудудий тижорат банки филиалининг мурожаатига асосан ўтказилган терговга қадар текширувда «Ш.А.» ва «Ҳ.М.» МЧЖлар масъул шахслари ва бошқалар ўзаро тил бириктириб, парранда ва озуқа еми сотиб олиш учун «Ш.А.» МЧЖга ажратилган 2 млрд сўм кредитни «Ҳ.М.» МЧЖга ўтказиш орқали нақдлаштириб олиб, талон-торож қилгани аниқланган.

Департаментнинг Поп тумани бўлими томонидан ўтказилган терговга қадар текширувда «С.С.» МЧЖ раҳбари М.Х. ва иш юритувчиси Ў.М. ҳудудий тижорат банки филиалидан МЧЖга аёллар гўзаллик салони ва фитнес спорт тўгарагини ташкил этиш учун ажратилган имтиёзли кредит эвазига ҳарид қилинган спорт анжомлари ва жиҳозларини сотиб юбориб, жами 1,2 млрд сўм кредит маблағини ўзлаштириш йўли билан талон-торож қилгани аниқланган.

Департаментнинг Ғузор тумани бўлими томонидан ўтказилган терговга қадар текширувда эса фуқаро Р.К. яқин қариндоши Ш.Х.нинг номидан «Н.С.» деҳқон хўжалигини давлат рўйхатидан ўтказиб, чорва молларини кўпайтириш ва йилқичилик фаолиятини амалга ошириш, зотдор отлар сотиб олиш ҳамда кўпайтириш учун банк филиалидан ажратилган 700 млн имтиёзли кредит маблағини бошқа мақсадларда сарфлаб, талон-торож қилгани аниқланган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўткзилмоқда.

Мавзуга доир: 

• Тошкентда 1,3 млрд сўм кредит маблағини ўзлаштирганлар аниқланди
• Наманганда МЧЖ раҳбарлари 700 млн сўм кредит пулини талон-торож қилди