Пентагон Украинага етказмалар туфайли бўшаб қолган қурол-яроғ захираларини тўлдириш учун қурол сотиб олиш ва шартномаларни бажариш жараёнларини тезлаштирмоқда. Бу ҳақда Reuters АҚШ мудофаа вазирининг харидлар, логистика ва технологиялар бўйича ёрдамчиси Дуглас Бушга таяниб хабар берди.
Пентагон вакили журналистларга маълум қилишича, идора авваллари кетма-кет бажарилган жараёнларни энди бир вақтнинг ўзида бирданига амалга оширмоқда. Шунингдек, унинг таъкидлашича, АҚШ армиясида қурол-яроғ захираларининг қисқариш суръатлари назорат кўрсаткичларидан 15 фоизга ошиб кетган.
Украинага етказиб берилган қурол-яроғ ўрнини тўлдириш учун АҚШ ҳукумати президентнинг махсус ваколатлари доирасида 2,6 миллиард долларлик шартномалар тузди. Ушбу ваколатлар фавқулодда вазият юзага келган тақдирда тезкорлик билан, конгресс тасдиғисиз ҳаракат қилиш имконини беради. Шу билан бирга, ўтган бир ой ичида қарийб 1 миллиард долларлик шартномалар тузилган (асосан ўқ-дори ва ракеталар бўйича).
АҚШ ҳарбий ёрдам доирасида Украинага етказиб беришни ваъда қилган баъзи қурол-яроғ ва ўқ-дорилар захираларининг камайиши муаммосига дуч келгани ҳақида CNN ноябрь ўрталарида ҳукуматдаги бир нечта манбаларига таяниб хабар берган эди.
Ҳозирча захиралари қисқариб кетган қуроллар ва ўқ-дорилар ишлаб чиқаришни тезкорлик билан йўлга қўйиш, шунингдек, уларни Европадаги иттифоқдошларидан сўраш имконияти бўлмаяпти, дейилганди хабарда.
АҚШ — Украинанинг асосий иттифоқчиларидан бири. Уруш бошланганидан кейин Америка Украинага бир неча марта кўп миллиардлик ҳарбий ёрдам пакетларини ажратди, шунингдек, у учун ижара ёки узоқ вақт бўлиб-бўлиб тўлаш шарти билан қурол-яроғ етказиб бериш имконини берувчи ленд-лиз дастурини ишга туширди.
АҚШ мудофаа вазири Ллойд Остин АҚШ Украинага 20 миллиард доллардан ортиқ ҳарбий ёрдам кўрсатгани ва қанча вақт керак бўлса, шунча вақт Киевни қўллаб-қувватлашда давом этишини айтганди.
Изоҳ (0)