Украина расмийлари таслим бўлган рус асирларининг қатл этилиши акс этган видеони текширишни бошлади. Бу ҳақда Украина бош вазирининг Европа ва Евроатлантика интеграцияси бўйича ўринбосари Олха Стефанишина хабар берди.
«Албатта, Украина расмийлари ушбу видео бўйича текширув олиб боради», деди у ва эълон қилинган кадрлар Россиянинг айбловларини исботлаши «даргумон» эканини айтди. Гап 18 ноябрь куни ижтимоий тармоқларда тарқала бошлаган видео ҳақида кетмоқда. Тахминларга кўра, у Луганск халқ республикасининг Макеевка қишлоғида олинган. Кадрларда русларникига ўхшаш ҳарбий кийимдаги одамлар бирин-кетин ёпиқ ҳудуддан чиқиб, ерга ётгани кўрсатилган.
Уларнинг ортидан қўлига сариқ боғичли форма кийган эркаклар (украиналик аскарлар деб қаралмоқда) чиқади. Таслим бўлган асирлардан қайси бири офицер экани сўралади. Кейин тасвирда одамнинг қиёфаси пайдо бўлади, видеода отишмалар эшитилади, тасвир узилиб қолади. Ҳодисанинг давоми олинган видеода 12 нафар ҳарбийнинг жасад акс этган.
Россия Мудофаа вазирлиги видео далиллар Зеленский бошчилигидаги ҳозирги Киев режими ва уни ҳимоя қилаётганларнинг «ваҳшийлигини» тасдиқлашини билдирган. Шу билан бирга, украиналик аскарлар ҳарбий асирлар билан муомала қилиш бўйича Женева конвенциясининг барча талабларига мувофиқ сақланаётгани таъкидланган.
«Аммо Зеленский ва унинг тарафдорлари қийноққа солинган ва ўлдирилган ҳар бир маҳбус учун жавоб бериши керак», дейилади Мудофаа баёнотида.
Мазкур баёнот ортидан БМТ Инсон ҳуқуқлари бўйича Олий комиссари бошқармаси ўлдирилган россиялик ҳарбий асирларнинг видеоларини текшираётганини маълум қилди.
Изоҳ (0)