Rossiyalik milliarderlar Ukraina atrofidagi keskinlik tufayli bir oy ichida qariyb 28 mlrd dollar yo‘qotdi

Ukraina atrofidagi vaziyatning keskinlashuvi va Rossiya fond bozorining qulashi oqibatida 104 nafar rossiyalik milliarderning umumiy boyligi 2021-yil 20-yanvardan 2022-yil 25-yanvarga qadar 27,9 milliard dollarga kamaydi, deb xabar beradi Forbes.

Forbes jurnali hisob-kitoblariga ko‘ra, bir oy ichida 104 nafar milliarderning 76 nafarining boyligi kamaygan. Shu bilan birga, ularning o‘n nafari 1 milliard dollardan ortiq mablag‘ yo‘qotgan.

Eng katta yo‘qotishni “Novatek” va “Sibur” kompaniyalarining asosiy egasi hisoblanuvchi Leonid Mixelson boshdan o‘tkazgan — uning boyligi 2,1 milliardga kamayib, 25,5 milliard dollarga tushib ketdi. Undan keyingi o‘rinni “Novatek” va “Sibur” direktorlar kengashi a’zosi Gennadiy Timchenko 1,9 milliard dollarlik yo‘qotish bilan egallagan (boyligi 22,8 milliard dollarni tashkil etmoqda).

Shuningdek, 1 milliard dollardan ortiq mablag‘ yo‘qotganlar qatoridan quyidagilar ham o‘rin olgan:

• Suleymon Kerimov, senator, uning oilasi “Polyus” kompaniyasini nozorat qiladi (minus 1,8 milliard dollar, boyligi 13,1 milliar dollarni tashkil etmoqda);
• Aleksey Mordashov, “Severstal”ning asosiy egasi (minus 1,7 milliard dollar, boyligi 24,5 milliar dollarni tashkil etmoqda);
• Denis Sverdlov, Arrival asoschisi (minus 1,6 milliard dollar, boyligi 1,9 milliar dollarni tashkil etmoqda);
• Andrey Melnichenko, Sibir ko‘mir energetika kompaniyasi va “Yevroxim” egasi (minus 1,5 milliard dollar, boyligi 23,9 milliar dollarni tashkil etmoqda);
• Oleg Tinkov, TCS Group asoschisi (minus 1,43 milliard dollar, boyligi 5,4 milliar dollarni tashkil etmoqda);
• Viktor Rashnikov, “Magnitogorsk metallurgiya kombinati” boshlig‘i (minus 1,3 milliard dollar, boyligi 11,3 milliar dollarni tashkil etmoqda);
• Mixail Fridman, LetterOne va “Alfa Grupp” egalaridan biri (minus 1,12 milliard dollar, boyligi 13,9 milliard dollarni tashkil etmoqda);
• Vladimir Potanin, “Norilsk Nikel” asoschisi va egasi (minus 1,1 milliard dollar, boyligi 25,5 milliard dollarni tashkil etmoqda).

Nisbatan hisoblaganda, elektromobillar ishlab chiqaruvchi Arrival kompaniyasi egasi Denis Sverdlovning boyligi eng ko‘p kamaygan, chunki uning aksiyalari bir oy ichida 46 foizga arzonlashgan. Forbes ma’lumotlariga ko‘ra, bu geosiyosiy vaziyat bilan emas, balki kompaniyaning ichki muammolariga bog‘liq.

Nisbatan yo‘qotishlar borasida ikkinchi o‘rinni “Yandeks” asoschisi Arkadiy Voloj egallagan bo‘lib, uning boyligi 26 foizga (minus 600 million dollar) kamaygan. Uchinchi o‘rinda esa Oleg Tinkov — 21 foiz boyligidan ayrilgan.

Avvalroq rossiyalik milliarder Roman Abramovich Portugaliya fuqaroligini olgani, Alisher Usmonovga tegishli USM kompaniyasi VK’dagi aksiyalari ulushini sotgani to‘g‘risida xabar berilgandi.