Ҳиндистоннинг Деҳли университетида Ўзбек тили ва ҳинд-ўзбек илмий-маданий алоқалари маркази очилди, деб хабар бермоқда «Дунё» ахборот агентлиги.
Қайд этилишича, марказ Тошкент давлат шарқшунослик университети ва Деҳли университети ўртасида эришилган келишувлар доирасида ташкил этилган. «Ўзбек тили ва ҳинд-ўзбек илмий-маданий алоқалари маркази» фаолиятининг асосий мақсади ҳиндистонлик талабаларга ўзбек тилини ўргатиш, маданий-маърифий алоқаларни ривожлантириш ва ушбу соҳада қўшма илмий изланишлар олиб боришга қаратилган.
Деҳли университети вице-канцлери марказ очилишидаги нутқида икки мамлакатлар халқлари ўртасидаги маданий-маърифий алоқалар кўп асрлик тарихга эга эканини қайд этиб, мазкур очилган марказ икки халқ ўртасида таълим соҳасидаги қадимги ришталарга ҳисса қўшишига ишонч билдирган. Бундан ташқари эришилган келишувлар икки университет илмий жамоатчилиги томонидан амалга ошириладиган қўшма илмий лойиҳалар, ўқитувчилар ва талабалар алмашинуви, қўшма таълим дастурлари орқали мутахассислар тайёрлаш ишлари учун ҳуқуқий асос бўлишига алоҳида урғу берган.
Мамлакат элчиси Дилшод Ахатов Ҳиндистоннинг энг етакчи олий таълим даргоҳларининг яна бирида ўзбек тили курсларининг йўлга қўйилиши икки давлат халқлари ўртасидаги мавжуд дўстлик ришталарини мустаҳкамлашини таъкидлаган. Янги очилган марказ фаолиятини ташкил этишда кўрсатилган кўмак ва фаоллик учун ТДШУ ва Деҳли университети раҳариятига миннатдорчилик билдирган.
Ўзбек тили ва ҳинд-ўзбек илмий маданий алоқалари маркази учун Шарқшунослик университети ҳамда Ўзбекистоннинг Ҳиндистондаги элчихонаси томонидан ўзбек тили, адабиёти, маданияти, тарихи ва замонавий тараққиёти ҳақидаги маълумотларни қамраб олган китоблар, бадиий адабиётлар, журналлар, ўқув-кўргазма қўлланмалари тўплами тақдим этилган.
Шу куннинг ўзида ўзбек тилини ўрганувчи талабалар учун ТДШУ ректори Гулчеҳра Рихсиева бошчилигида маҳорат дарслари ҳам ўтиб берилган.
Маълумот учун, Деҳли университети ўзбек тили бўйича ўқув курслари мавжуд бўлган Ҳиндистондаги учинчи олий таълим муассасасига айланди. Бунга қадар 2004 йилдан бошлаб Деҳли шаҳридаги Жомия Миллия Исломия университетида ҳамда 2021 йилдан бошлаб Жаваҳарлал Неру университетида ўзбек тили курслари фаолият юритиб келмоқда.
Изоҳ (0)