АҚШнинг Калифорния штати судьяси Эдвард Давила Theranos биотехнологик стартапи асосчиси Элизабет Холмсни 135 ой — 11 йилдан сал кўпроқ муддатга қамоққа ҳукм қилди. Бу ҳақда The New York Times хабар бермоқда.
Бундан ташқари, Холмс инвесторларга етказилган 121 миллион доллар миқдоридаги зарарни қоплаб бериши керак. Стартап яратувчиси муддатни ўташ учун қамоққа 2023 йил 27 апрелда етиб келиши керак. Унинг адвокатлари ҳукм устидан шикоят аризаси берилишини маълум қилди.
Январда маслаҳатчилар иштирокидаги суд Холмсни 11 та айблов бандининг тўрттаси бўйича айбдор деб топган эди. Прокуратура Холмсни 15 йилга қамоққа юбориш ва 800 миллион доллар ундиришни талаб қилди, ҳимоя томони эса унга 18 ойлик уй қамоғи ва жамоатчилик ишлари кўринишида жазо тайинлашни сўради.
Айбловларнинг учта банди фирибгарлик ва биттаси тил бириктириш билан боғлиқ бўлган.
Reuters маълумотларига кўра, суд мажлиси чоғида Холмс йиғлаб юборган ва ўз хатоларидан тушкунликка тушганини, агар имконияти бўлганида, бошқача йўл тутган бўлишини айтган. «Мен панд берганим учун одамлар бошидан кечирган нарсалар учун қаттиқ уяляпман», — деди у.
Элизабет Холмс Theranos’га 2003 йилда асос солган. Компания қонни бир лаҳзада таҳлил қилиб берувчи қурилмаларни ишлаб чиқаришга ваъда берган, ушбу технологияни эса, гўёки, Холмс ўйлаб топган. 2014 йилга келиб, Theranos компанияси қиймати 9 миллиард долларга баҳоланган.
2015 йилда Холмс айтган технология иш бермаётгани, Theranos бошқа компаниялар ускуналарида таҳлиллар ўтказаётгани, уларнинг натижалари эса хато чиқаётгани маълум бўлди. 2018 йилда Theranos тугатилди, 2021 йилда эса Холмс устидан суд бошланди.
Холмс билан боғлиқ воқеа бир неча марта экранлаштирилган. Хусусан, 2019 йилда «Ихтирочи» (The Inventor) номли ҳужжатли фильм, 2022 йилда эса «Сафдан чиқиш» (The Dropout) сериали намойиш этилган.
Изоҳ (0)