AQSHning Kaliforniya shtati sudyasi Edvard Davila Theranos biotexnologik startapi asoschisi Elizabet Xolmsni 135 oy — 11 yildan sal ko‘proq muddatga qamoqqa hukm qildi. Bu haqda The New York Times xabar bermoqda.
Bundan tashqari, Xolms investorlarga yetkazilgan 121 million dollar miqdoridagi zararni qoplab berishi kerak. Startap yaratuvchisi muddatni o‘tash uchun qamoqqa 2023-yil 27-aprelda yetib kelishi kerak. Uning advokatlari hukm ustidan shikoyat arizasi berilishini ma’lum qildi.
Yanvarda maslahatchilar ishtirokidagi sud Xolmsni 11 ta ayblov bandining to‘rttasi bo‘yicha aybdor deb topgan edi. Prokuratura Xolmsni 15 yilga qamoqqa yuborish va 800 million dollar undirishni talab qildi, himoya tomoni esa unga 18 oylik uy qamog‘i va jamoatchilik ishlari ko‘rinishida jazo tayinlashni so‘radi.
Ayblovlarning uchta bandi firibgarlik va bittasi til biriktirish bilan bog‘liq bo‘lgan.
Reuters ma’lumotlariga ko‘ra, sud majlisi chog‘ida Xolms yig‘lab yuborgan va o‘z xatolaridan tushkunlikka tushganini, agar imkoniyati bo‘lganida, boshqacha yo‘l tutgan bo‘lishini aytgan. “Men pand berganim uchun odamlar boshidan kechirgan narsalar uchun qattiq uyalyapman”, — dedi u.
Elizabet Xolms Theranos’ga 2003-yilda asos solgan. Kompaniya qonni bir lahzada tahlil qilib beruvchi qurilmalarni ishlab chiqarishga va’da bergan, ushbu texnologiyani esa, go‘yoki, Xolms o‘ylab topgan. 2014-yilga kelib, Theranos kompaniyasi qiymati 9 milliard dollarga baholangan.
2015-yilda Xolms aytgan texnologiya ish bermayotgani, Theranos boshqa kompaniyalar uskunalarida tahlillar o‘tkazayotgani, ularning natijalari esa xato chiqayotgani ma’lum bo‘ldi. 2018-yilda Theranos tugatildi, 2021-yilda esa Xolms ustidan sud boshlandi.
Xolms bilan bog‘liq voqea bir necha marta ekranlashtirilgan. Xususan, 2019-yilda “Ixtirochi” (The Inventor) nomli hujjatli film, 2022-yilda esa “Safdan chiqish” (The Dropout) seriali namoyish etilgan.
Izoh (0)