Сречко Катанец: «Россия билан ўйинга тайёрмиз»

Ўзбекистон терма жамоаси бош мураббийи Сречко Катанец Россияга қарши ўйин олдидан ўз фикрлари билан ўртоқлашди.

Ўйин ҳақида

Ассалому алайкум. Қисқа гапирадиган бўлсам, Россия билан ўйинга тайёрмиз. Кучли жамоага қарши ўйнаймиз. Қозоғистон билан ўйиндан кейин тикланишга ҳаракат қилдик. Мавсум охири ва чарчоқ бўлиши табиий.

Россиянинг Тожикистон билан ўйини ҳақида

Ҳа, албатта ўйинни кўрдим. Биринчи навбатда баҳс сунъий майдонда ўйналганини айтиш керак. Мен сунъий майдонда ўйнашни ҳатто бошқа спорт тури деб атаган бўлардим. Шахсан менга сунъий майдонда ўртоқлик учрашувини таклиф қилишса дарҳол йўқ дейман. Бундай майдонда ҳатто тўп ҳам бошқача юради ва сакрайди.

Россия сафида кўп футболчилар дебют қилди. Тожикистон терма жамоаси ҳам яхши ўйнади. Ўйиндан аввал журналистлар Тожикистон аутсайдер дейишлари мумкин, аммо футбол ўзгарди. Ҳозир бундай агрессив ва яхши ҳимоялана оладиган жамоага қарши ўйнаш қийин.

Россияга қарши агрессив ўйин кўрсатиш борасида

Албатта, жамоамдан шундай ўйнашни сўрайман. Россия ва Ўзбекистон чемпионатларини таққосласак ҳам фарқни кўришимиз мумкин.

Ўруновга имкон бериб, Абдухолиқов захирада қолдирилгани ҳақида

Абдухолиқовнинг ўйинларини кузатиб бораман. Одатда мен клубсиз футболчиларни терма жамоага чақирмайман. Аммо Ўруновда менга керак бўлган жиҳатлар борлиги учун чақирдим. Ўрунов ва Абдухолиқовнинг позициялари бошқача.

Шомуродов ўйинни бошлади, унинг ўрнига Сергеев тушди. Ўрунов қанотларда ҳам ўйнай олади, Бобур ҳам бу жойда тўп тепа олади. Аммо мен шундай қарор қилдим, албатта, мен сизнинг фикрингизни ҳам ҳурмат қиламан.

Ҳимоянинг кучсизлиги борасида

Доим ҳимоямиз кучсиз деган савол берилади, аммо ҳимоя ҳужумдан бошланади. Агар барча позициялар яхши ўйнаса натижа ижобий бўлади. Ҳужумчи ва ярим ҳимоячилар ўз ишини яхши қилмаса демак ҳимоячиларга иш кўпаяди. Замонавий футболчи ҳар бир позицияда алоҳида ўйнаши иложсиз. Кучли жамоаларга қарасангиз ҳимояланишга фақат ҳимоячилар жавобгар эмас. Ҳимоячи берадиган биринчи пас ҳужумга шиддат бериши мумкин.

Валерий Карпин Шомуродовни «қийшиқ оёқ» деб чақириши ҳақида

У мана шу оёқлари билан жуда кўп голлар урди, демак оёғи мана шундай қола қолсин (кулади).

Сречко Катанец, Ўзбекистон терма жамоаси бош мураббийи