Twitter компанияси ўз офисларини 21 ноябрь, душанба кунига қадар ёпиб қўйди, деб хабар бермоқда BBC. Ходимларга хат юборилиб, офис биноларини тарк этиш сўралди ва уларнинг Twitter биноларига кириш учун рухсатномалари амал қилиши тўхтатилди.
«Ҳар битта ходимнинг, шунингдек, Twitter тизимлари ва фойдаланувчилар маълумотлари хавфсизлигини таъминлаш учун офисларимиз вақтинчалик ёпилади, рухсатномалар орқали кириш тўхтатилади», — дейилади хатда.
Business Insider маълумотларига кўра, «локаут»га компания эгаси Илон Маскнинг ички қўпорувчиликлар эҳтимолидан хавфсирагани сабаб бўлган бўлиши мумкин.
Бу орада Маскнинг ультиматумидан кейин Twitter ходимлари ёппасига ишдан кетишни бошлагани айтилмоқда. Аллақачон юзлаб ишчилар компанияни тарк этган.
16 ноябрь куни Маск ходимларига ультиматум қўйиб, қаттиқ ишлашни ёки ишдан кетишни буюрган эди. Бу ҳақда у ўз ходимларига электрон хат юборган. У компанияда қолаётган ходимлар «узоқ соат ва юқори интенсивлик билан» ишлашини ёзган.
Маскнинг қўлига ўтганидан сўнг Twitter харажатларни камайтириш учун 3700 га яқин ходимини ишдан бўшатганди. Аксарият ходимлар электрон почта ва Slack каби корпоратив тизимларга кира олмай қолганидан кейин ишдан бўшатилганини тушунган.
Изоҳ (0)